खोटाङ । खोटाङको केपीलासगढी गाउँपालिकाको एक माध्यमिक विद्यालयकी छात्रामाथि उनकै विद्यालयका साथीहरूले सामूहिक बलात्कार गरेका छन् ।
१४ वर्षीया बालिकालाई बलात्कार गरेको आरोपमा पीडित पक्षले १५ र १६ वर्षीय बालकविरूद्ध साउन २० गते जिल्ला प्रहरी कार्यालयमा उजुरी दिएको हो ।
आरोपितले बालिकालाई साउन १९ गते विद्यालयबाट घर फर्किँदै गरेको अवस्थामा सामूहिक बलात्कार गरेको आरोपमा आरोपितहरुविरूद्ध जिल्ला प्रहरी कार्यालयमा उजुरी दिएको बालिकाका दाजुले बताए ।
कक्षा ८ मा अध्ययनरत बालिकालाई कक्षा ९ मा अध्ययनरत साथीहरूले सामूहिक बलात्कार गरेको आरोपमा पीडित पक्षले आरोपितहरुविरूद्ध जिल्ला प्रहरी कार्यालयमा उजुरी दिएको इन्स्पेक्टर सुशान्त मिश्रले बताए ।
घटनाका आरोपितहरुविरूद्ध प्रहरीले जिल्ला सरकारी वकिलको कार्यालयमार्फत जिल्ला अदालतमा साउन २१ गते बलात्कार शीर्षकमा मुद्दा दर्ता गराएर कानुनी कारबाही अघि बढाएको छ ।
पीडित बालिकाको स्वास्थ्य परीक्षण साउन २० गते जिल्ला अस्पतालमा गरिएको छ ।
