विराटनगर । टेकफिनिटी सोलुसन्स एन्ड रिसर्च सेन्टर प्रालिको आयोजना गरेको २४ दिने सीप स्तरोन्नति तालिमको समापन गरिएको छ ।
विराटनगरस्थित ओएसिस क्याफेमा सोमबार तालिममा सहभागी प्रशिक्षार्थीहरूलाई प्रमाणपत्र वितरण गर्दै उक्त तालिमको समापन गरिएको हो ।
क्यान महासंघ मोरङको सहकार्य तथा इन्स्यिर-हेल्भेटास नेपालको प्राविधिक सहयोगमा उक्त तालिम आयोजना भएको थियो ।
तालिममा सहभागी प्रशिक्षार्थीहरूलाई आयोजक संस्था टेक्फिनिटी सोलुसनका फाउन्डर सुजित झा, इन्स्योर नेपालका घनश्याम लिम्बु, क्यान महासंघ मोरङका अध्यक्ष सुमितकुमार शाह, शीर्षक इन्टरप्राइजेजका डाइरेक्टर एवम् तालिम संयोजक स्वप्निल कार्की, आदर्श माविका टेक्स कार्यक्रम संयोजक पर्वत श्रेष्ठ र शब्द एक्सप्रेसका सम्पादक माधव काफ्लेले प्रमाणपत्र वितरण गरेका थिए ।
प्रमाणपत्र वितरण कार्यक्रममा बोल्दै बक्ताहरूले विश्वबजारमा ‘ट्रेन्डिङ’ का रूपमा रहेको डिजिटल मार्केटिङबारे सिकेर स्वरोजगार बन्न सकिने भन्दै तालिमको औचित्य प्रकाश पारेका थिए ।
इन्स्योर नेपालका घनश्याम लिम्बुले दिगो तथा सम्मानित रोजगारीका लागि सिप परियोजनाअन्तर्गत रहेर आयोजित सीप स्तरोन्नति तालिमले प्रशिक्षार्थीहरूको व्यक्तित्व विकासमा मात्र नभएर विश्व बजारमा आवश्यक जनशक्ति उत्पादनमा पनि टेवा पुर्याउने सुनाए ।
तालिममा ६० जनाका लागि कम्प्युटर अपरेटर र डिजिटल मार्केटिङका विषयविज्ञहरूले सहजीकरण गरेको तालिम संयोजक स्वप्निल कार्कीले बताए ।
केही वर्षयता निरन्तर आयोजना गरिँदै आएको यस्ता तालिमले भविष्यमा पनि निरन्तरता पाउने उनको भनाइ छ ।
