विराटनगर । कोशी प्रदेश सरकारले आज (आइतबार) आर्थिक वर्ष २०८२–८३ को बजेट सार्वजनिक गर्दै छ ।
बजेट प्रस्तुत गर्नका लागि प्रदेशसभा बैठक आज दिउँसो ३ बजे बोलाइएको छ । तथापि, निर्धारित समयमा बैठक भने सुरु भएको छैन ।
प्रदेशका आर्थिक मामिला तथा योजना मन्त्री रामबहादुर मगरले आगामी वर्षको बजेट प्रस्तुत गर्दैछन् । चालु आर्थिक वर्षका लागि उनले ३६ अर्ब २४ करोड ३५ लाखको बजेट ल्याएका थिए ।
प्रदेश सरकारले आगमी आर्थिक वर्षका लागि ल्याउने बजेट ३७ अर्ब हाराहारीको हुनेछ । मुख्यमन्त्री हिक्मतकुमार कार्कीले ३७ अर्ब हाराहारीको हुने बताएका हुन् ।
झापाको गौरदह क्याम्पसमा शनिबार आयोजित कार्यक्रमलाई सम्बोधनका क्रममा उनले प्रदेशको बजेट निरन्तर घट्ने क्रममा रहेकाले आगामी आर्थिक वर्ष २०८२–८३ को बजेट ३७ अर्ब हाराहारीको हुने बताएका थिए ।
‘अहिले हामीले तानतुन पारेर ३७ अर्ब जतिको बजेट तयार गरिरहेका छौँ,’ उनले भनेका थिए,‘वास्तविक श्रोतको अवस्था हेर्ने हो भने अहिले हामीसँग ३३ अर्ब बराबरको मात्र स्रोत छ।’
प्रदेशले सार्वजनिक गर्ने बजेटमा प्रत्यक्ष निर्वाचित सांसदलाई २ करोड ५० लाखका दरले बजेट दिइएको छ ।
सामानुपातिक सांसदलाई १ करोड ५० लाखका दरले बजेट दिइएको छ ।
सांसदका योजनाहरूमा भौतिक पूर्वाधार विकास मन्त्रालय बजेट छुट्याइएको छ ।
