नेपाल पत्रकार महासंघले जिल्ला अदालत काठमाडौंको आदेश संविधानको व्यवस्था, मर्म, प्रेस स्वतन्त्रताको प्रचलित मान्यता र अभ्यासविपरीत भएकाको भन्दै आपत्ति जनाएको छ ।
महासंघले बुधबार विज्ञप्ति जारी गर्दै अदालतले मंगलबार नेपालखबर र बिजमाण्डुलाई समाचार ‘डिलिट’ गर्न दिएको आदेश संविधानविपरीत भएको भन्दै आपत्ति जनाएको हो ।
‘लोकतन्त्रमा न्यायालयको निर्णय पालना हुनुपर्छ भन्नेमा महासंघ दृढ छ र सम्मान समेत गर्दछ,’ महासचिव रामप्रसाद दाहालद्वारा जारी विज्ञप्तिमा भनिएको छ, ‘तर, अदालतको यो आदेश नेपालको संविधानका व्यवस्था र मर्म, प्रेस स्वतन्त्रताको प्रचलित मान्यता र अभ्यासविपरीत भएकाले यसप्रति महासंघ आपत्ति प्रकट गर्दछ ।’
महासंघले अदालतलाई आदेशको पुनर्विचार गर्न निकायसँग आग्रह पनि गरेको छ ।
‘अन्यथा त्यसविरुद्ध अदालती प्रक्रिया तथा अन्य गतिविधि गर्न बाध्य हुने प्रष्ट पार्दछ,’ महासंघले भनेको छ । पत्रकार महासंघले सञ्चारमाध्यममा प्रकाशित सामग्रीको सम्पूर्ण जिम्मेवारी सम्बन्धित सञ्चारमाध्यमकै हुने भन्दै पत्रकार आचारसंहिताको पूर्ण पालना गर्न पनि आग्रह गरेको छ ।
