विराटनगर । विराटनगरको इडेनबर्ग कलेजले स्नातकमा कोशी प्रदेशको दोस्रो र तेस्रो हुने दुई छात्रालाई नगदसहित सम्मान गरेको छ ।
विराटनगर महानगरपालिका–९ बसपार्क नजिक रहेको कलेजले बुधबार एक कार्यक्रमको आयोजना गर्दै बिबिएस दोस्रो वर्षको परीक्षामा अब्बल नतिजा ल्याउने दुई छात्रासहित विद्यार्थीहरूलाई सम्मान गरेको हो ।
गत वर्षको माघमा भएको परीक्षामा कलेजकी छात्र दीपिका चौधरीले ७५ प्रतिशत अंक हासिल गरेकी थिइन् ।
प्रदेशभरि नै दोस्रो हुन सफल दीपिकालाई कलेजले ११ हजार रुपैयाँ नगद पुरस्कार दिँदै एक वर्षको छात्रवृत्ति पनि उपलब्ध गराएको हो ।
सम्मानपछि बोल्दै दीपिकाले कलेजले दिएको पठनपाठनको वातावरणले गर्दा अब्बल अंक ल्याउन सफल भएको सुनाइन् ।
यस्तै, प्रदेशभरिकै तेस्रो हुन सफल भएकी पूजा साहलाई पनि सम्मान गरिएको थियो ।
७४.४ प्रशित अंक ल्याएकी उनलाई पनि कलेजले एक वर्षको छात्रवृत्ति उपलब्ध गराएको छ ।
त्यसबाहेक उक्त परीक्षामा उत्तीर्ण भएर कलेजमा उपस्थित विद्यार्थीहरूलाई अभिर र खादा लगाएर सम्मान गरिएको थियो ।
उनीहरूलाई कलेजका अध्यक्ष विष्णु दाहाल, प्रिन्सिपल डिके साह, फाउन्डर संयोग पोखरेल, फाउन्डर तथा कोअर्डिनेटर शम्भुप्रसाद महतो, कृष्ण निरौलालगायत शिक्षक–शिक्षिकाले सम्मान गरेका थिए ।
यसअघि २०७८ सालमा इडेनबर्गले बिबिएस प्रथम वर्षमा सर्वोत्कृष्ट नतिजा ल्याएको स्मरण गराउँदै कलेजका प्रिन्सिपल डिके साहले आगामी दिनमा विद्यार्थीलाई नेपाल प्रथम बनाउने लक्ष्य लिएको बताए ।
शैक्षिक गुणस्तरमा इडेनबर्ग कलेज एकपछि अर्को सफलताको साथ एक अब्बल शैक्षिक संस्थाका रूपमा स्थापित हुँदै गइरहेको छ ।
