संखुवासभाको उत्तरी भेग भोटखोला गाउँपालिका–१ किमाथांकामा आएको बाढीले नेपाल–चीन सिमानामा रहेको सीमा स्तम्भ बगाएको छ ।
निरन्तरको वर्षापछि जेठ १८ गते दोङगोप्पा खोला र छोकाङ खोलामा आएको बाढीले ७१ नम्बरको सीमा स्तम्भ बगाएको हो ।
जिल्ला प्रहरी कार्यालय सङ्खुवासभाका प्रमुख डीएसपी दक्षकुमार बस्नेतका अनुसार बगाइएको सीमा स्तम्भ किमाथांका नाकानजिकै रहेको प्रहरी चौकीबाट करिब १५ किलोमिटर उत्तरतर्फ पर्छ ।
प्रहरी वरिष्ठ नायब निरीक्षक टिकाराम सुनुवारको टोली गस्तीमा रहेको बेला सीमा स्तम्भ बगाएको जानकारी प्राप्त भएको हो ।
डीएसपी बस्नेतका अनुसार निरन्तर वर्षाका कारण माथिल्लो भेगमा बाढीको जोखिम बढ्दो छ, जसले गर्दा सीमा क्षेत्रसमेत प्रभावित भएको हो ।
अहिले ७१ नम्बर सीमा स्तम्भ पुरिएर हराएको अवस्था छ। सङ्खुवासभा जिल्लामा हाल कुल २१ वटा सीमा स्तम्भ रहेका छन् ।
