प्रहरीले सुनसरीको हरिनगरा गाउँपालिकाको कटान खोला बगरबाट ११ सय केजी बढी गाँजा बरामद गरेको छ ।
जिल्ला प्रहरी कार्यालय सुनसरीकाअनुसार हरिनगरा गाउँपालिकाको वडा नम्बर ५ र ६ को सिमानामा पर्ने कटान खोलाको बगरमा पुरेर लुकाइ रहेको अवस्थामा १ हजार १ सय २० किलोग्राम तयारी गाँजा बरामद गरिएको हो ।
नेपालबाट भारती बजारमा गाँजा तस्करी हुने गरेको छ । तर खोलाको बगरमा कसले गाँजा लुकाएर राखेको हो त्यसबारे पहिचान हुन सकेको छैन । मङ्गलबार बेलुका घुस्कीस्थित प्रहरी चौकीले सूचना पाएपछि देवानगञ्जस्थित इलाका प्रहरी कार्यालयका प्रहरी निरीक्षक कमल विष्ट, प्रहरी नायब निरीक्षक सुरेश यादव, सुरक्षा वेस क्याम्प बसन्तपुरबाट प्रनानी विष्णुबहादुर दनुवार र जिल्ला प्रहरी कार्यालयबाट प्रनानी महेश ढकाल, शसस्त्र प्रहरी बल घुस्कीबाट सहायक प्रहरी निरीक्षक नरेन्द्र घिमिरे, बसन्तपुर बीओपीबाट सहायक प्रहरी निरीक्षक इन्द्रजंग थापाको संयुक्त टोलीले बगर उत्खनन गरी गाँजा बरामद गरेको हो ।
विभिन्न रङ्गका ३८ वटा प्लास्टिकको बोरामा प्याक गरी राखेको अवस्थामा बरामद गाँजा जिल्ला प्रहरी कार्यालय सुनसरीमा ल्याई थप अनुसन्धान गरिरहेको प्रहरीले जनाएको छ ।
धनकुटाको शहीदभूमि गाउपालिका क्षेत्रमा सबैभन्दा बढी गाँजा उत्पादन हुने गरेको छ । सुनसरीको बराहक्षेत्र, विष्णुपादुका हुँदै तस्करले ल्याएको तयारी गाँजा भारतीय तस्करले लिन ढिलाई गरेपछि बगरमा लुकाएर राखेको हुन सक्ने अनुमान गरिएको छ ।
