दमक । झापामा करेन्ट लागेर एक हात्तीको मृत्यु भएको छ ।
कमल गाँउपालिका-३ मा पर्ने रतुवामाई वृक्षारोपण आयोजनाको जंगल क्षेत्रभित्र करेन्ट लागेर मृत्यु भएको हो ।
मृतावस्थामा मंगलबार बिहान हात्ती भेटिएको जिल्ला प्रहरी कार्यालय झापाले जानकारी दिएको छ ।
घटनास्थलमा हात्तीको एउटा दारा र सुँड डढेको अवस्थामा फेला परेको जिल्ला प्रहरी कार्यालय झापाका प्रमुख राजन लिम्बुले बताए ।
उनले हात्तीले फलामको बिजुलीको पोलमा धक्का दिँदा करेन्ट लागेको हुनसक्ने प्रारम्भिक अनुसन्धानबाट खुलेको पनि जानकारी दिए ।
हात्तीको सुँड जलेर खरानी भएको छ । बिजुलीको पोलमुनी हात्ती डढेको अवस्थामा देखेपछि स्थानीयले प्रहरीलाई खबर गरेका थिए ।
रतुवामाई वृक्षारोपण आयोजनाको यो बाटो भएर नियमित रुपमा हात्तीहरु हिँड्ने भए पनि यस प्रकारको घटना अहिलेसम्म नभएको जनाइएको छ ।
पानी परेका कारण विजुलीको पोलमा करेन्ट प्रवाह भएको हुनसक्ने र त्यहाँ आएर हात्तीले छोएका कारण यो घटना भएको बताइएको छ ।
