विराटनगर । विराटनगरमा आगामी शनिबार र आइतबार सीप उत्सव २०८२ हुने भएको छ ।
जेठ १० र ११ गते उद्योग संगठन मोरङको सभाहलमा पहिलो संस्करणको सीप उत्सव हुने भएको हो ।
उद्योग संगठन मोरङ, इन्स्योर र हेल्भेटास नेपालको संयुक्त आयोजना तथा सामाजिक विकास मन्त्रालयको समनव्यमा वैशाख २२ देखि ३० गतेसम्म सीप उत्सवको अडिसन राउन्ड भएको थियो ।
प्रदेशका सात प्राविधिक शिक्षालयहरूमा अध्ययनरत सयभन्दा बढी प्रशिक्षार्थीबीच तीन विधामा भएको स्पर्धाबाट १६ जना छानिएका थिए ।
सूचना प्रविधि, होटल म्यानेजमेन्ट र अटो मोबाइलमा उत्कृष्ट बनेका प्रशिक्षार्थीबीच उपाधिका लागि प्रतिस्पर्धा हुने उद्योग संगठन मोरङका महानिर्देशक चूडामणि भट्टराईले जानकारी दिए ।
उनका अनुसार सीप उत्सवको उपाधि प्रतिस्पर्धासँगै बालविकास सहजकर्ता, सूचना प्रविधि र इलेक्ट्रिकल विषयमा प्रत्यक्ष तालिमका सेसनहरू पनि हुनेछन्, जसमा निःशुल्क सहभागिता जनाएर तालिमको अनुभव र प्रमाणपत्र समेत लिन सकिने छ ।
सीप उत्सवमा एसइई र कक्षा १२ दिएर बसिरहेका विद्यार्थीहरूका लागि पेशाकर्मी एवम उद्यमीमार्फत वृत्ति विकास परामर्शको सुवर्ण अवसर पाउने उद्योग संगठन मोरङका अध्यक्ष राकेश सुरानाले बताए ।
उक्त कार्यक्रममा फेसन डिजाइन, आइ.टी. होटल म्यानेजमेन्ट, अटोमोबाइललगायतका क्षेत्रका विज्ञ तथा युवा उद्यमीहरूका सफलताका कथा सुन्न र संवाद गर्न पाइने बताउँदै उनले प्रशिक्षार्थीहरू र औद्योगिक क्षेत्रका व्यक्तिबीच सीप उत्सवले पुलको काम गर्ने बताए ।
वैशाख २२ गतेदेखि एक सातासम्म इटहरीको नरबहादुर बहुप्राविधिक शिक्षालय, बूढीगंगाको मनमोहन स्मृति पोलिटेक्निक, जहदाको शैलजा आचार्य स्मृति पोलिटेक्निक, कन्काईको कन्काई पोलिटेक्निक, दमकको पुष्प-धीरेन्द्र स्मृति प्रतिष्ठान, विराटनगरको आदर्श माध्यमिक विद्यालय र बिर्तामोडको नरबहादुर कर्माचार्य स्मृति प्रतिष्ठानमा सीप प्रतिस्पर्धा र सीप प्रदर्शनी भएको थियो ।
कम्प्युटर असोसियसन अफ नेपाल महासंघ (क्यान) मोरङ, होटल म्यानेजमेन्ट असोशसियसन अफ नेपाल (हान), नेसनल अटोमोबाइल डिलर्स असोसियसन अफ नेपाल (नाडा) समेत यस कार्यक्रमको सहयोगी संस्थाका रूपमा रहेका छन् ।
यस सीप उत्सवमा फरक ढंगबाट उद्योग आफैं अग्रसर भइ प्रत्यक्ष रूपमा सीप र वृत्ति परामर्श गरी दक्ष जनशक्ति उत्पादनमा महत्त्वपूर्ण भूमिका रहने आयोजक इन्स्योर परियोजनाका घनश्याम लिम्बुले जानकारी दिए ।
उनका अनुसार यस सीप उत्सवले विद्यार्थीहरूलाई प्राविधिक ज्ञान र सीप प्रदर्शन गर्ने र करिअर निर्माणमा सहयोग पुग्नेछ ।
