विराटनगर । कोशी प्रदेश सरकारले आगामी वैशाख १८ र १९ गते आयोजना गर्न लागेको लगानी सम्मेलनको सम्पूर्ण तयारी पूरा भएको जनाएको छ ।
विराटनगरमा बिहीबार पत्रकार सम्मेलन गर्दै प्रदेश लगानी प्राधिकरणले सम्मेलनमा पर्यटन, कृषि, उद्योग, पूर्वाधार, स्वास्थ्यलगायतका क्षेत्रका ७१ वटा परियोजना सोकेसिङ गरिने जनाएको छ ।
कोशी प्रदेश लगानी प्राधिकरणका कार्यकारी निर्देशक सरोज कोइरालाका अनुसार सोकेसिङ हुने परियोजनाको अनुमानित लागत १ खर्ब ७३ अर्ब ४९ करोड रुपैयाँ रहेको छ ।
लगानी सम्मेलनमा चीन, रुस, अमेरिका, दक्षिण कोरिया, भारतलगायत देशका लगानीकर्ता तथा गैरआवासीय नेपालीहरूको उपस्थिति रहनेछ ।
कोइरालाका अनुसार २० जना विदेशी लगानीकर्ताले पनि सम्मेलनमा उपस्थिति जनाउने छन् । उनीहरूले पर्यटन, कृषि, उद्योग, पूर्वाधार, स्वास्थ्यलगायतका क्षेत्रका चासो देखाएको कोइरालाको भनाइ छ ।
त्यसबाहेक स्वदेशका प्रतिष्ठित उद्योगपतिहरूको समेत सहभागीता रहने बताइएको छ ।
प्रदेश सरकारका अनुसार लगानीलाई प्रोत्साहन गर्न आठवटा कानुन अध्यादेशमार्फत संशोधन गरिसकिएको छ ।
संघीय सरकारसँगको सहकार्यमा अन्य कानुनी अवरोध हटाउने प्रयास भइरहेको बताइएको छ ।
सम्मेलनमा कृषि र पर्यटनको सम्भावना, औद्योगिक उत्पादन र बजारीकरण, पूर्वाधार विकास र ऊर्जा, स्वास्थ्य सेवा र मेडिकल शिक्षामा लगानीका अवसरबारे विषयगत छलफलहरू सञ्चालन हुनेछन् ।
पहिलो दिनको मुख्य सत्रमा तीन तहका सरकारहरूबीचको समन्वय र लगानीमैत्री वातावरणबारे विशेषज्ञ तथा जनप्रतिनिधिहरूले धारणा राख्नेछन् ।
प्रदेश सरकारले लगानी सम्मेलनलाई नतिजामुखी बनाउने उद्देश्यले सम्मेलनअघि प्री मिट तथा सम्मेलनपछि फलोअप मिटिङहरू सञ्चालन गर्ने रणनीति तय गरेको छ ।
परियोजनामा देखिएका समस्या समाधान गर्दै अगाडि बढ्ने नीति लिइएको कार्यकारी निर्देशक कोइरालाले जानकारी दिए ।
संघीयता कार्यान्वयनपछि प्रदेश सरकारको तहबाट पहिलोपटक आयोजना हुन लागेको यो लगानी सम्मेलन ऐतिहासिक र उपलब्धिमूलक हुने प्रदेश सरकारले दाबी गरेको छ ।
