विराटनगर । सुनसरीको दुहबी नगरपालिका-४ मालहट्टीबाट शनिबार कारमा राखिएको ठूलो परिमाणमा लागुऔषध गाँजा बरामद भएको छ ।
चालकले सडकमै छाडेर हिँडेको बा ७ च ९२६३ नम्बरको मारुती कारको डिकीबाट १ क्वीन्टलभन्दा बढी गाँजा बरामद भएको हो ।
इलाका प्रहरी कार्यालय दुहबीबाट खटिएको टोलीले दुहबी-४ मालहट्टीबाट शनिबार कारलाई नियन्त्रणमा लिएको थियो ।
विशेष सूचनाका आधारमा प्रहरीले नियन्त्रणमा लिने प्रयास गरेसँगै कार सडकमै छाडेर चालक फरार भएका थिए ।
कार नियन्त्रणमा लिएर खानतलासी गर्दा डिकीभित्र जेब्रा झोलामा लुकाएर राखिएको १ सय १६ किलोग्राम गाँजा बरामद भएको हो ।
बरामद भएको गाँजा र गाँजा लोड गरिएको कारलाई नियन्त्रणमा लिएर इलाका प्रहरी कार्यालय दुहबीमा राखिएको छ ।
फरार रहेका कार चालकको खोजी भइरहेको र घटनाको थप अनुसन्धान सुरु गरिएको प्रहरीले जनाएको छ ।
