विराटनगर । मोरङको ग्रामथान गाउँपालिकाकी १५ वर्षीया बालिकालाई बलात्कार गरी फरार रहेका एक जना पक्राउ परेका छन् ।
पक्राउ पर्नेमा ग्रामथान गाउँपालिका–७ निवासी २६ वर्षीय अनन्त साह रहेका छन् । घटना भएको एक महिनापछि उनलाई पक्राउ गरिएको प्रहरीले जनाएको छ ।
उनले गत फागुन २३ गते राति करिब १०:०० बजे १५ वर्षीया बालिकालाई बलात्कार गरी फरार भएका थिए ।
उक्त आपराधिक घटनापछि फरार रहेका साहलाई सोमबार (आज) इलाका प्रहरी कार्यालय हरैंचाबाट प्रहरी नायब निरीक्षक (प्रहरी नायब निरीक्षक) नीरबहादुर खड्काको नेतृत्वमा खटिएको प्रहरी टोलीले पक्राउ गरेको हो ।
लुकीछिपी बसेको अवस्थामा फेला पारी उनलाई पक्राउ गरिएको प्रहरीले जनाएको छ ।
प्रहरीका अनुसार, पक्राउ परेका साहलाई आवश्यक अनुसन्धान तथा कानुनी कारबाहीको लागि बेलबारी पठाइएको छ । घटनासम्बन्धी थप अनुसन्धान भइरहेको जनाइएको छ ।
