विराटनगर । २० दिनअघि मात्र वैदेशिक रोजगारीका क्रममा कतार गएका सप्तरीका एक युवकको मृत्यु भएको छ ।
मृत्यु हुनेमा सप्तरीको रूपनी गाउँपालिका-४ का २३ वर्षीय रोशनकुमार यादव रहेका छन् ।
वैदेशिक रोजगारीका लागि २० दिन अघि कतार गएको यादवको रोजगारीकै क्रममा यही चैत ६ गते मृत्यु भएको गाउँपालिका अध्यक्ष दिनेशकुमार यादवले बताए ।
यादवको शव बुधबार बिहान घर आइपुगेको छ ।
घरको अवस्था सामान्य रहेकाले परिवारको खर्च टार्न विदेशिएको दुई हप्तामै यादवको मृत्यु भएपछि वडा नम्बर ४ का स्थानीय शोकमा डुबेको वडाध्यक्ष छेदी इसरले जानकारी दिए ।
यादवको बुधबार बिहान गाउँपालिकामा अन्त्येष्टि गरिएको छ । मृतकको यादवको एक तीन वर्षीया छोरी र श्रीमती छन् ।
योसँगै चालु आर्थिक वर्ष २०८१/०८२ मा यस जिल्लाबाट वैदेशिक रोजगारीका लागि विदेश गएका २० जनाको मृत्यु भएको अप्रवासी स्रोत केन्द्र सप्तरीका कार्यक्रम संयोजक राजेन्द्र यादवले जानकारी दिएका छन् ।
