विराटनगर । विराटनगर महानगरपालिका–११ जनपथ टोलमा रहेको गोल्डेन अस्पतालले उपचार खर्च तिर्न नसकेपछि शव बन्धक बनाएको पाइएको छ । मोटरसाइकल दुर्घटनामा परी घाइते भई उपचारका लागि आएका व्यक्तिको मृत्यु भएपछि एक युवकको शव अस्पतालले बन्धक बनाएर राखेको हो ।
गत फागुन २८ गते राति ८ः३० बजेतिर विराटनगर–११ नयाँ गुद्रीमा बसपार्कबाट नयाँ गुद्रीतर्फ जाँदै गरेको प्र.१–०२–४४प ९२३१ नम्बरको मोटरसाइकलले सोही दिशातर्फ जाँदै गरेको साइकलयात्रीलाई ठक्कर दिएको थियो ।
मोटरसाइकलको ठक्करबाट साइकलयात्री विराटनगर–१२ बस्ने ३० वर्षीय सञ्जय कामत टाउको र कानमा चोट लागेर गम्भीर घाइते भएका थिए ।
अत्यधिक मादक पदार्थ सेवन गरी सुनसरी बर्जु गाउँपालिका–५ का २७ वर्षीय राजेश चौधरीले चलाएको मोटरसाइकलको ठक्करबाट गम्भीर घाइते भएका कामतको आठ दिनपछि बिहीबार बिहान ३ः३० बजेतिर मृत्यु भएको थियो ।
दुर्घटना गराउने चौधरीले उपचार खर्च तिर्न सकेनन् । त्यसपछि पैसा तिर्नुपर्ने बाध्यता आफूहरूको काँधमा आएको मृतकका भाइ अजयकुमार कामत बताउँछन् ।
‘दुर्घटना गराउनेले उपचार खर्च तिरिदिएन, हामीले नै तिर्नुपर्ने भयो,’ उनले शब्द एक्सप्रेससँगको कुराकानीमा भने, ‘तर, हाम्रो आर्थिक अवस्था राम्रो छैन । यसैले अफ्ठेरोमा पर्यौं ।’
‘गोल्डेन अस्पतालले कि त दुर्घटना गराउनेबाट पैसा जोहो गराउनुस् कि त आफन्तहरूबाट उठाएर बुझाउनुस् भनेको छ,’ अजयले भने, ‘दुर्घटना गराउनेले दिएन । संकलन गर्न पनि ठुलो रकम छ ।’
उनका अनुसार अस्पतालमा उपचार खर्च ७ लाख रुपैयाँ उठेको छ । औषधि र स्वास्थ्य सामग्री भने जसोतसो किनिएको उनको भनाइ छ । मृतक सञ्जय विराटनगरको घाँसचोकस्थित मनोज स्क्रिन प्रिन्टमा काम गर्थे ।
कामबाट घर फर्किँदै गर्दा उनी दुर्घटनामा परेका थिए । उपचारका क्रममा मृत्यु भएपछि सदगदका लागि शव निकाल्न खोज्दा अस्पतालले लास दिन अस्वीकार गरेको थियो ।
शव नपाएपछि आन्दोलित आफन्तले स्थानीय जनप्रतिनिधिलाई बोलाएर छलफलसमेत गरेका थिए ।
विराटनगर–१२ का वडाध्यक्ष हिरालाल कामत र विराटनगर–६ का वडाध्यक्ष अक्ष सहनीसहितले अस्पतालसँग शव लैजान पाउनेगरी सहमति गरेको थियो ।
जनप्रतिनिधिले दुर्घटना गराउनेसँग उपचार खर्च उठाएर अस्पताललाई तिरिदिने प्रतिबद्धता जनाएपछि शव लैजान पाउनेगरी सहमति भएको मृतकका भाइ अजयले बताए ।
‘भर्खरै मात्र शव लैजान पाउनेगरी सहमति भएको छ,’ मृतकका भाइ अजयले भने, ‘अब, कोशी अस्पतालमा लगेर पोस्टमार्टम गर्ने तयारी गरेका छौं । शव दिइसक्नु भएको छैन । तर, दिनुहुन्छ होला !’
यो विषयमा अस्पतालका कर्मचारीहरूसँग कुरा हुन सकेन । अस्पतालका प्रवक्ता सुधीर राथोडले आफू बाहिर रहेको सुनाए भने अर्का कर्मचारी मोहम्मद ज्याहुल हकको फोन स्विच अफ थियो ।
