ताप्लेजुङ । खडेरीले आजित बनेका ताप्लेजुङका किसानले आइतबार पानी माग्दै तमोर नदीमा पूजा-आजा गरेका छन् ।
पानी नपरेर खडेरीको समय लम्बिँदै गएपछि आठराई त्रिवेणी गाउँपालिका-२ फूलबारीका किसानले तमोर नदीमा पूजा आयोजना गरेका हुन् ।
ईन्द्र भगवानको पूजा गरेमा पानी पर्ने विश्वाससहित उनीहरूले तमोर नदी र काबेली खोलाको संगमस्थल त्रिवेणीमा पानी माग्दै वर्षा र सहकालका देवता मानिने ईन्द्र भगवानको पूजा गरेका हुन् ।
लामो समयदेखि पानी नपरेका कारण बोका बलि चढाउँदै इन्द्र भगवानको पूजा गरिएको फूलबारीका वडाध्यक्ष टेकिन्द्र सेन्दाङ लिम्बूले जानकारी दिए ।
वडाध्यक्ष सेन्दाङका अनुसार ईन्द्र भगवानको पूजा गरे पानी पर्ने जनविश्वास रहेकाले स्थानीय किसानले नदी किनारमा गएर पूजा आयोजना गरिएको हो ।
उनले लामो खडेरीका कारण समयमा खेतीबाली लगाउन नपाएको र लगाएको बाली सुक्न थालेपछि पानी माग्दै पूजा गर्नु रहर नभइ बाध्यता भएको बताए ।
फूलबारीका पाँच दर्जन बढी किसान परिवारले संयुक्त रूपमा तमोर नदीमा पूजा आयोजना गरेको पनि उनले जानकारी दिए ।
लामो समयसम्म खडेरी पर्दा ग्रामीण क्षेत्रमा पानी माग्दै ईन्द्र भगवानको पूजा गर्ने साथै भ्यागुताको विवाह गर्नेलगायतको प्रचलन रहिआएको छ ।
