ताप्लेजुङ । ताप्लेजुङस्थित प्रसिद्ध तीर्थस्थल पाथीभरा (मुक्कुमलुङ) मा फागुन महिनामा १३ लाख रुपैयाँभन्दा बढी भेटी रकम संकलन भएको छ ।
पाथीभरा क्षेत्र विकास समितिले शुक्रबार सार्वजनिक गरेको भेटी विवरणअनुसार फागुन महिनामा कुल १३ लाख तीन हजार ५०० रुपैयाँ संकलन भएको हो ।
समितिका कार्यकारी निर्देशक प्रजिन हाङ्बाङका अनुसार पाथीभरामा संकलित उक्त भेटी रकम जिल्लास्थित विभिन्न बैंकमा जम्मा गरिएको छ ।
गएको माघ महिनामा भने २४ लाख एक हजार ५०० रुपैयाँ भेटी रकम संकलन भएको थियो ।
समितिले प्रत्येक महिनामा संकलन तथा गणना हुने भेटी रकम सार्वजनिक गर्दै आएको छ । यता फागुन महिनामा सात हजार ४२८ जना भक्तजनले पाथीभराको दर्शन गरेका पनि समितिले जनाएको छ ।
