महोत्तरी । नेपाल उद्योग वाणिज्य महासंघका अध्यक्ष समेत रहेका आइएमई ग्रुपका अध्यक्ष चद्र ढकालले नयाँ प्रविधिमा आधारित कागज उद्योग सञ्चालनमा ल्याएका छन् ।
ढकालको नेतृत्वमा महोत्तरीमा २ अर्ब बढीको लगानीमा देशकै सबैभन्दा ठूलो कागज उद्योग स्थापना भएको हो ।
प्रधानमन्त्री केपी शर्मा ओलीले बिहीबार नेपाल पल्प एण्ड पेपर इण्डष्ट्रिजको उद्घाटन गरेका हुन् ।
महोत्तरीको गौशाला नगरपालिका–१, रामनगरमा आयोजित कार्यक्रमबीच प्रधानमन्त्री ओलीले सो उद्योगको उद्घाटन गरे ।
प्रधानमन्त्री ओलीले उद्योग उद्घाटन गर्दै उद्योग स्थापनाले चुलो-चौकोमा सीमित रहनेका लागि पनि सीपका साथै रोजगारी सिर्जना गर्ने बताए ।
उनले आफ्नै कागज देशभित्र प्रयोग गर्ने अवसर र व्यापार घाटा सन्तुलनका लागि यसले योगदान दिई आत्मनिर्भर बनाउन सहयोग गर्ने विश्वास व्यक्त गरे ।
प्रधानमन्त्री ओलीले निजी क्षेत्रको प्रयासबिना समृद्धि हासिल नहुनेमा सरकार स्पष्ट रहेकाले औद्योगिक विकास र रोजगारी सिर्जनामा प्राथमिकता दिइने जनाए ।
उनले भने, ‘अब हामी आत्मनिर्भरताको बाटोमा लाग्नुको विकल्प छैन । सहकार्यका माध्यमबाट युवाहरूले आपको खेती विकास गर्न सक्छन्। यसमा प्रदेश सरकारहरु पनि अघि सरुन् ।’’
आइएमई ग्रुपको यो उद्योग स्थापना भएसँगै नेपालमा पहिलो पटक नष्ट भएका कागजबाट नयाँ कागज उत्पादन भएर आयात कम गर्न सहयोग पुग्ने अध्यक्ष ढकालले बताए ।
यस उद्योगले करिब तीन सयको रोजगारी दिने उनको भनाइ छ ।
नेपाल उद्योग वाणिज्य महासंघका अध्यक्षसमेत रहेका ढकालले पाथीभरा केबलकार निर्माण सुरु भएपछि जिल्लाबाहिरका मानिसहरु गएर बिरोध गरेको पनि बताए ।
बुधबार महोत्तरीमा देशकै सबैभन्दा ठूलो कागज उद्योग नेपाल पल्प एण्ड पेपर इड्रट्रिजको उद्घाटन कार्यक्रममा ढकालले पाथीभरा स्थानीय मागको परियोजना भएको बताए ।
उनकाअनुसार त्यहाँको पर्यावरण कायम गरेर केबलकार निर्माण गर्न लागिएको हो ।
मेगा आयोजना सुरु भएपछि जिल्ला बाहिरबाट गएर अवरोध भएको भन्दै उनले गुनासो गरे । यसले विदेशी लगानीलाई समेत प्रभावित पार्ने उनको भनाइ छ ।
