विराटनगर । विराटनगर महानगरपालिका-७ जलजलाचोक नजिक रहेको मेरिल्यान्ड कलेजले आफ्नो २२औं वार्षिकोत्सव तथा अभिभावक दिवस मनाएको छ ।
कलेज परिसरमा शुक्रबार विराटनगर महानगरपालिका प्रमुख नागेश कोइरालाको प्रमुख आतिथ्यतामा विविध कार्यक्रमको आयोजना गरी कलेजले वार्षिकोत्सव तथा अभिभावक दिवस मनाएको हो ।
वार्षिकोत्सवको अवसर पारेर कलेजले विभिन्न सालमा कक्षा १२ को बोर्ड परीक्षामा उत्कृष्ट अंक प्राप्त गर्ने विद्यार्थी र बिबिएस तहमा बोर्ड प्रथम तथा द्वितीय हुने छात्रछात्रालाई पुरस्कृतसमेत गरेको थियो ।
यसैगरी, कलेजको आन्तरिक परीक्षामा अब्बल अंक ल्याउने तथा आन्तरिक खेलकुद कार्यक्रमका विजेता विद्यार्थीहरू सम्मानित भएका थिए ।
त्यसबाहेक, कलेजमा १५ वर्षभन्दा बढी कार्य गर्ने शिक्षक तथा कर्मचारीलाई पनि सम्मान गरिएको थियो ।
यसरी सम्मानित हुनेमा दिपेशकुमार भगत, मदन खतिवडा, महेन्द्रनारायण कर्ण, नवजीत प्रधान, शशीभूषण कर्ण, श्यामकुमार झा, विजयकुमार दाहाल, लेखनाथ निरौला, मुक्तिनारायण गच्छदार, विनोद भट्टराई र देवकी मरिक रहेका छन् ।
उनीहरूलाई दोसल्ला ओढाएर मुख्य अतिथि तथा विराटनगरका मेयर नागेश कोइराला, कलेजका प्रिन्सिपल लक्ष्मण ढकाललगायतले सम्मानपत्रका साथ सम्मान गरेका थिए ।
सम्मानपछि बोल्दै प्रमुख अतिथि कोइरालाले मेरिल्यान्ड विराटनगरको ऐतिहासिक कलेज बताए । व्यवस्थापन संकायमा कोशी प्रदेशकै उत्कृष्ट रहेको कलेजमा पछिल्लो समय विद्यार्थीहरूको आकर्षक उत्तिकै बढेको कोइरालाको भनाइ छ ।
यस्तै, कलेजका प्रिन्सिपल ढकालले पठनपाठनसँगसँगै अतिरिक्त क्रियाकलापमा पनि अब्बल साबित भएको कलेज देशभरिकै उत्कृष्ट सातमा पर्न सफल भएको स्मरण गराए ।
२०५९ सालमा स्थापना भएको कलेजले आगामी शैक्षिकसत्रदेखि विज्ञान संकायमा पनि पठनपाठन थाल्ने उनको भनाइ छ ।
कार्यक्रममा मुख्य अतिथि कोइराला र प्रिन्सिपल ढकालका साथै कलेजका अध्यक्ष गुणराज ढुंगेल, उपाध्यक्ष पिके झा, हिसानका केन्द्रीय उपाध्यक्ष तथा कलेजका डाइरेक्टर भेषराज पोखरेललगायतले आफ्नो मन्तव्य राखेका थिए ।
वार्षिकोत्सव कार्यक्रममा विद्यार्थीहरूले नृत्य-नाटक गरेर उपस्थित अतिथि, अभिभावकलाई मनोरञ्जन दिलाएका थिए ।
