बैतडी । पञ्चेश्वरको उज्वल गाउँका विश्वकर्मा समुदाय दमाईंको शव बोकेर मलामी गएका छन् ।
दलितभित्र कायम रहेको जातीय विभेद हटाउन विश्वकर्मा समुदायका अगुवा दमाईंको शव बोकेर मलामी गएका हुन् ।
पञ्चेश्वर गाउँपालिका–४, उज्वल गाउँकी कमला दमाईंको मृत्यु भएपछि परिवारमा शव बोक्ने मानिस नहुँदा विश्वकर्मा समुदायका वड र लोहार जाति संयुक्त रूपमा मलामी गएको स्थानीय जयराम लोहारले बताए ।
उज्वल गाउँमा विश्वकर्मा समुदायका ६८ परिवार भए पनि दमाईं जातिको दुई परिवारको मात्रै बसोवास रहेको उनले बताए ।
“पुरानो कुसंस्कार हटाउनुपर्छ भनेर संयुक्त मलामी गएका हौं। उज्वल गाउँमा केही वर्ष अघिसम्म विश्वकर्माले दमाईंको शव बोकेर मलामी जाने चलन थिएन । अहिले त्यस्तो विभेद छैन। कुसंस्कार सबै ठाउँबाट हटाउनुपर्छ भनेर लागि परेका छौँ,” उनले भने ।
उज्वल गाउँ तत्कालीन माओवादी युद्धका बेला आधार क्षेत्र भएकाले यहाँ दलितभित्र जातीय विभेद हटिसकेको स्थानीय सहिद परिवारका युवा धर्मराम वडले बताए ।
उनले लोकतन्त्र स्थापनापछि दमाईं र विश्वकर्माबिच काँधमै शव बोकेर मलामी जाने संस्कार बसिसकेको बताए ।
श्रीमतीको मृत्युपछि शव बोकेर मलामी जान विश्वकर्मा समुदायले सहयोग गरेको मृतकका श्रीमान् गजेन्द्रले बताए ।
उनले आफ्नो घरमा मलामी जाने जम्मा दुई जना मात्रै भएको बताए ।
गजेन्द्र नेकपा (एमाले) पञ्चेश्वर गाउँपालिका कमिटी उपसचिव समेत हुन् ।
स्थानीय श्रीकेदार आधारभूत विद्यालय व्यवस्थापन समितिका अध्यक्षसमेत रहेका गजेन्द्रले उज्वल गाउँका दलित समुदायभित्र व्यवहारमै जातीय विभेद हटिसकेको बताए ।
उज्वल गाउँकी कमला दमाईंको बुधबार अपराह्न अस्पताल लैजाने क्रममा बाटोमै मृत्यु भएको थियो ।
बुवाको वार्षिकीमा सहभागी हुन पञ्चेश्वरबाट श्रीमान्सँगै दशरथचन्द नगरपालिका–२, मुडाप गाउँ गएकी कमलाको अचानक पेट दुःखेर बिरामी परेको उनका श्रीमान् गजेन्द्र दमाईंले बताए ।
