काठमाडौं । स्थानीय बजारमा सुनको मूल्य बढेर तोलाको एक लाख ७० हजार रुपैयाँ नाघेको छ ।
सोमबार प्रतितोला एक लाख ६९ हजार छ सय रुपैयाँमा कारोबार भएको सुनको मूल्य बढेर मंगलबार एक लाख ७० हजार दुई सय रुपैयाँमा कारोबार भएको हो ।
नेपाल सुनचाँदी व्यवसायी महासंघका अनुसार यसअघि गत कात्तिक ११ मा सुन प्रतितोला एक लाख ७१ हजार रुपैयाँ पुगेको थियो ।
त्यतिबेला सरकारले सुन आयातमा लाग्दै भन्सार महसुल घटाएसँगै मूल्य घटेर एक लाख ४८ हजार रुपैयाँ झरेको थियो ।
त्यसपछि दुई महिना उतारचढाव रहेको सुनको मूल्य माघ लागेसँगै पुनः बढ्न थालेको हो ।
अन्तर्राष्ट्रिय बजारमा निरन्तर मूल्य बढ्दा त्यसको प्रभाव स्थानीय बजारमा पर्न गएको हो ।
मंगलबार अन्तर्राष्ट्रिय बजारमा प्रतिऔँस सुनको मूल्य दुई हजार ९२१ डलर पुगेको छ ।
अमेरिकाका राष्ट्रपति डोनाल्ड ट्रमले परिर्वतन गरेका नीतिका कारण सुनको मूल्य निरन्तर बढ्दै गएको हो ।
सुनचाँदी व्यवसायी महासंघका अनुसार अमेरिकाका राष्ट्रपतिले विभिन्न देशमा लगाउने भनेको भन्सार शुल्कका कारण लगानीकर्ता सुनमा आकर्षित हुँदा मूल्य बढ्न गएको हो ।
नयाँ नीतिका कारण सुनको मूल्य निरन्तर बढेको छ । यसरी नै बढ्दै गयो भने केही दिनमै एक लाख ७५ हजार रुपैयाँ पुग्ने देखिएको छ ।
अन्तर्राष्ट्रिय बजारमा प्रतिऔँस सुनको मूल्य बढेर तीन हजार डलर पुग्ने देखिएको छ, त्यतिबेला स्थानीय बजारमा प्रतितोला सुनको मूल्य तोलामा दुई लाख पुग्ने अनुमान गरिएको छ ।
अमेरिकाका राष्ट्रपति ट्रम्पले चीन, क्यानडा र मेक्सिकोबाट आयात हुने सामानमा २५ प्रतिशतसम्मको भन्सार महसुल लगाउने घोषणा गरेसँगै त्यसको प्रभावले सुनको मूल्य बढ्न गएको हो ।
महासंघका अनुसार पछिल्लो एक महिनामा बजारमा प्रतितोला सुनको मूल्य १५ हजार रुपैयाँले बढेको छ ।
पुसको अन्तिम साता प्रतितोला एक लाख ५५ हजार आठ सय रुपैयाँमा कारोबार भएको सुनको मूल्य बढेर एक लाख ७० हजार दुई सय रुपैयाँ पुगेको छ ।
नेपाल राष्ट्र बैंकले विभिन्न वाणिज्य बैङ्कमार्फत दैनिक २० किलोसम्म सुन आयात गर्न पाउने सीमा निर्धारण गरेको छ ।
नेपाल बैंकर्स संघका अनुसार करिब १४५ किलो सुन बैंघमा मौज्दात छ ।
बजारमा सुनको माग न्यून हुँदा बैंकमा ठुलो परिणाममा मौज्दात रहेको हो ।
चालु आर्थिक वर्ष २०८१/८२ को माघ अन्तिम सातासम्म बैंकहरूले ७३२ किलो सुन आयात गरेका छन् ।
पछिल्लो समय निरन्तर सुनको मूल्य बढ्दा कारोबारमा भने कमी आएको छ । विवाहको सिजन भए पनि मूल्यवृद्धि भई माग कम हुँदा कारोबारमा कमी आएको हो ।
महासंघका अनुसार हाल दैनिक १० देखि १५ किलो सुन खपत हुने गरेको छ ।
विगतका वर्ष विवाहका बेला दैनिक २० देखि ३० किलो खपत हुने गरेको थियो ।
अन्तर्राष्ट्रिय बजारमा मूल्य निरन्तर बढ्दै जाँदा उपभोक्ताको क्रयशक्ति कम भएकाले बजारमा माग नै न्यून रहेको व्यवसायीको भनाइ छ ।
नयाँ सडकका मुख्य बजारका सुन पसलमा ग्राहकको भिडभाड देखिए पनि भित्री पसल भने सुनसान छन् ।
लगातार बढेको सुनको मूल्यले उपभोक्ता र व्यवसायी दुवैलाई असर पारेको छ ।
व्यवसायीका अनुसार मूल्य बढ्दा पुराना गहना बिक्री गर्ने ग्राहकसमेत बढ्न थालेका छन् ।
