विराटनगर । मोरङको सुन्दरहरैंचा नगरपालिकामा आगामी बुधबारदेखि चौथो संस्करणको ‘सुन्दरहरैंचा विराट एक्स्पो’ हुने भएको छ ।
सुन्दरहरैंचा- १०, विराटचोकमा माघ ३० देखि फागुन १० गतेसम्म एक्स्पो हुने भएको हो ।
सुन्दरहरैंचा उद्योग वाणिज्य संघले आइतबार पत्रकार सम्मेलनमा नगर क्षेत्रमा आठवटा सार्वजनिक शौचालय निर्माणका लागि एक्स्पोको आयोजना गर्न लागिएको जानकारी दिएको छ ।
नगरमा यसअघि दुई वटा सार्वजनिक शौचालय निर्माण भइसकेका छन् भने दुई वटा निर्माणधीन छन् ।
नगरको हरैंचा र खोर्सानेमा निर्माणाधीन सार्वजनिक शौचालयलाई पूरा गर्ने र थप चारवटा निर्माण गर्ने लक्ष्यसाथ एक्स्पो आयोजना हुन लागेको हो ।
सुन्दरहरैंचा उद्योग वाणिज्य संघका पूर्वअध्यक्ष एवम् एक्स्पो आयोजक समितिका संयोजक भोलेश्वर दुलालका अनुसार १५ करोड ६२ लाखमा आठ वटा सार्वजनिक शौचालय निर्माणको डिपिआर तयार भएको थियो ।
जसमध्ये विराट चोक र सलकपुरमा सार्वजनिक शौचालय सञ्चालनमा आइसकेका छन् ।
नगरको खोर्साने र हरैंचामा सञ्चालनको अन्तिम अवस्थामा पुगेका छन् ।
थप चार वटा निर्माण गर्नका लागि खर्च जुटाउन एक्स्पोको आयोजना गरिएको उद्योगी दुलालले बताए ।
आयोजक सुन्दरहरैंचा उद्योग वाणिज्य सङ्घका अध्यक्ष नारायण कार्कीले चार करोड खर्च हुने अनुमान गरिएको एक्स्पोको तीन लाख मानिसले अवलोकन गर्ने बताए ।
अध्यक्ष कार्कीका अनुसार एक्स्पो आयोजना गर्न चार करोड रुपैयाँ खर्च हुने अनुमान गरिएको छ ।
