विराटनगर । मोरङको उर्लाबारी नगरपालिका–५ स्थित एक मोबाइल पसल फोडेर मोबाइल चोरी भएको छ ।
सोमबार बिहान पसलको सटर फोडेर चोरी भएको जिल्ला प्रहरी कार्यालय मोरङले जनाएको छ ।
प्रहरीका अनुसार उर्लाबारी–७ का स्थानीय योगराज कार्कीले सञ्चालन गर्दै आएको पसलमा अधिकतम् आइफोनको नयाँ सिरिज, सामसुङ, रेडमी, ओपोलगायतका ४५० बढी थान मोबाइलको बढी राखिएको थियो ।
जिल्ला प्रहरी कार्यालय मोरङका प्रवक्ता तथा प्रहरी नायब उपरीक्षक वेदप्रकाश जोशीका अनुसार सटर फोडेर मोबाइल र गल्लामा रहेको रकमसमेत चोरी भएको हो ।
मोबाइल वर्ल्ड नामक सो पसलमा भएको चोरीको विषय प्रहरीसमक्ष बिहान ९ बजे पसल सञ्चालक कार्की पसलमा पुगेपछि मात्र जानकारी भएको थियो ।
पूर्व–पश्चिम राजमार्गमा रहेको पसलबाट पूर्वकाकडभिट्टा, उत्तरतर्फ पहाडी जिल्लादेखि काठमाडौँ, पोखरासम्मका ग्राहकलाई आइफोन बिक्री हुँदै आएको थियो ।
सामाजिक सञ्जाल टिकटकमा समेत विज्ञापन गर्दै आएका कार्कीका अनुसार चोरी गर्नेको हालसम्म कुनै पहिचान हुन सकेको छैन ।
त्यसैगरी प्रहरी प्रवक्ता जोशीका अनुसार ताला फुटाएर गरिएको चोरीमा ठूलै गिरोह रहेको अनुमान छ । उनले पसलमा सिसीटिभी क्यामेरामा चोरी गर्नेको फुटेज कैद भए पनि पहिचान गर्न गाह्रो भएको बताए ।
