विराटनगर । कन्चनपुरमा एक महिनाको अवधिमा दुई प्रहरी जवानले आफैंमाथि गोली चलाएका छन् ।
गएराति सुदूरपश्चिम प्रदेश विपद् व्यवस्थापन गुल्म महेन्द्रनगर, कञ्चनपुरमा कार्यरत प्रहरी जवान २८ वर्षीय वकिल विष्टले ड्युटीमा रहेको बेला आफैँलाई गोली प्रहार गरेका छन् ।
गोली प्रहारबाट प्रहरी जवान विष्टको टाउँकोमा गम्भीर चोट लागेको छ ।
घटनालगतै विष्टलाई उपचारका लागि महाकाली प्रादेशिक अस्पतालमा लगिएको थियो ।
तर, उपचार हुन नसकेपछि उनको थप उपचारका लागि धनगढीस्थित निसर्ग अस्पतालमा लगिएको छ ।
के कति कारणले आफैंलाई गोली प्रहार गरे भन्ने विषयमा थप अनुसन्धान भइरहेको र उनको स्वास्थ्य अवस्था जटिल रहेको जानकारी प्राप्त भएको जिल्ला प्रहरी कार्यालय, कञ्चनपुरका डिएसपी उमेशराज जोशीले बताए ।
यसअघि गत महिना ०८१ पुस १२ गते राति जिल्ला प्रहरी कार्यालय, कञ्चनपुरमा कार्यरत प्रहरी जवान चक्रप्रसाद न्यौपानेले पनि ड्युटीमा रहेकै समयमा आफैँमाथि गोली प्रहार गरेका थिए ।
गोली प्रहारबाट टाउँकोमा गम्भीर चोट लागेका न्यौपानेको स्वास्थ्य उपचारपछि घर फर्किएका थिए ।
