विराटनगर । वृद्ध उमेरका चेतप्रसाद गौतम र उनकी श्रीमती गोमा घरिघरि भक्कानिन्छन् ।
सानैदेखि काखमा हुर्काएको नाति गम्भीर रोगले थलिएपछि ग्रामथान गाउँपालिका-७ नेताचोकका गौतम दम्पतीको अहिले होस्–हवास उडेको छ ।
१८ वर्षीय नाति अभिनाष बराल ललितपुरको जावलाखेल ब्लड क्यान्सर हस्पिटलमा मृत्युसँग जुधिरहँदा यी गौतम दम्पत्ति छट्पटाइरहेका छन् ।
हुन पनि आफ्नो आँगनमा खेलेर हुर्किएको नाति मृत्युसँग संघर्ष गरिरहँदा कुनचाहिँ हजुरबुबा–हजुरआमाको मन पोल्दैन होला र !
उदयपुरको नेपालटार घर भए पनि आमा र बहिनीसँगै मामाघरमा बस्दै आएका अभिनाश कक्षा १२ मा पढ्दै छन् ।
गत पुसको दोस्रो सातातिर अभिनाष अध्ययनरत सुकुना क्याम्पसले शैक्षिक भ्रमणमा पोखरालगायत विभिन्न ठाउँ पुर्यायो ।
त्यहाँबाट फर्किएपछि अभिनाषलाई खोकी लागिरहन्थ्यो ।
नगर अस्पतालमा चेकजाँच गराउँदा उनको ब्लडमा इन्फेक्सन भएको रिपोर्ट आयो ।
नगर अस्पतालले रिफर गरेअनुसार विराट टिचिङमा ल्याएर अभिनाषको पुनः परीक्षण गरियो ।
उक्त परीक्षणपछि भने अभिनाषको मामाघरमा सन्नाटा छाएको छ ।
विराटमा चेकजाँचपछि नेताचोक फर्किएकी अभिनाषकी आमा देवका बरालले माइतीमा वृद्ध उमेरका बुबा आमालाई विष माग्न थालेपछि हात–गोडा कमाएका गौतम दम्पत्ति अझै निराश छन् ।
नातिको रोग निको हुनेमा उनीहरू ढुक्क त छन् तर उपचार खर्च जुटाउन नसक्दा गौतम दम्पित्ति अत्यासमा छन् ।
व्हाइट ब्लड सेल ड्यामेज भएर थलिएका अभिनाषको उपचार रक्तरोग विशेषज्ञ डा. विशेष पौडेलले गरिरहेका छन् ।
उनकी आमा देवकाका अनुसार अभिनाषको उपचारमा करिब ३० लाख रुपैयाँ खर्च हुन्छ ।
जसमा बोनम्यारो ट्रान्स्प्लान्टका लागि १५ लाख खर्च लाग्ने उनको उपचारमा संलग्न चिकित्सकले बताएका छन् ।
हालसम्म जेनतेन पाँच लाख रुपैयाँ खर्च जुटाउन सफल उनीहरूले अभिनाषको जीवन बचाइदिन सबैतिर हार–गुहार गरिरहेका छन् ।
चेतप्रसाद र गोमा केही वर्षयता नेताचोकमा भाडाको घर लिएर बस्छन् ।
वार्षिक ३६ हजार घरभाडा तिर्दै आएका उनीहरूले अरूको खेत अधियाँमा कमाउँदै आएका छन् ।
गौतम दम्पतीका दुई छोरा हालैमात्र वैदेशिक रोजगारका लागि विदेश गएका छन् ।
उनीहरूले आफू जाँदा लागेको ऋण पनि तिरिसकेका छैनन् ।
अभिनाषका बुबा दिलनाथ बराल पनि मलेसियामा छन् ।
तर, आमाबीचको चिसिएको सम्बन्धले मामाघरमा बस्दै आएका अभिनाषको उपचार खर्च जुट्न सकेको छैन ।
आफ्नो नातिको ज्यान जोगाइदिन ६७ वर्षीय चेतप्रसादको अपिल छ ।
‘मेरो नातिको जीवन बचाइदिन म सबैसँग आग्रह गर्छु,’ चेतप्रसाद भन्छन्, ‘एउटै नाति हो मेरो । होटल म्यानेजमेन्ट पढ्दै थियो । केही बनेर एक्ली आमालाई पाल्छ होला भनेको त रोगले लडायो ।’
अभिनाषले पछिल्लो १४ दिनयता किमो थेरापी गराइरहेका छन् ।
यो प्रक्रिया पूरा गर्न पनि खर्च अभाव भएको अभिनाषकी हजुरआमा गोमा बताउँछिन् ।
लाउँलाउँ-खाउँखाउँ भन्ने उमेरमा रोगले थलिएका अभिनाषलाई निको बनाउनका लागि आर्थिक रूपमा सहयोग गरिदिन परिवारको अपिल छ ।
यता, स्थानीय समाजसेवी अर्जुन गिरीले अभिनाषको उपचारका लागि आर्थिक जोहो जुटाउने अभियान चलाउने बताउँदै सबैलाई यसमा सहभागी हुन अपिल गरेका छन् ।
यस्तै, ग्रामथान-७ का वडाध्यक्ष वीरेन्द्र चौधरीले अभिनाषको उपचारमा आफ्नो आधा सुविधा प्रदान गर्ने प्रतिबद्धता जनाएका छन् ।
अहिलेलाई आठ हजार पाँच सय रुपैयाँ व्यक्तिगत रूपमा सहयोग गर्ने बताउँदै उनले पालिकाबाट पनि अभिनाषको उपचारमा सहयोग जुटाउन पहल गर्ने उनको भनाइ छ ।
