विराटनगर । दोलखाको तामाकोशी गाउँपालिका-६ का वडाध्यक्ष कृष्णप्रसाद फुयाँल स्थानीय तहका अरू जनप्रतिनिधिभन्दा फरक छन् ।
उमेरले ५८ वर्ष पुगेका फुयाँल सुविधामा पाएको मोटरसाइकल गाउँपालिकालाई नै फिर्ता गरी आफ्नै घोडा चढेर वडा कार्यालय जाने गरेका छन् ।
गाउँपालिकालाई आर्थिक भार कम होस् भन्दै सुविधामा पाएको मोटरसाइकल गाउँपालिकालाई फिर्ता गरेर घोडा चढ्न थालेका हुन् ।
२०७९ वैशाखमा भएको स्थानीय निर्वाचनमा नेपाली कांग्रेसबाट विजयी भएका फुयाँलले मोटरसाइकल फिर्ता गरेर एक लाख पाँच हजार रुपैयाँमा घोडा किनेर चढ्दै आएका हुन् ।
आफूसँगै निर्वाचित वडाध्यक्षहरू मोटरसाइकलमा हुइँकिएर कार्यालय जाँदा-आउँदा उनी भने हरेक दिन घोडा चढेरै कार्यालय जाउआउ गर्छन् ।
कार्यालयको कामकाजका लागि भनी गाउँपालिकाबाट लिएको मोटरसाइकल उनले कार्यालयमै बुझाएका छन् ।
तामाकोशी गाउँपालिकाले पालिकाका सबै वडाका वडाध्यक्षलाई काम गर्न सहजताका लागि मोटरसाइकल उपलब्ध गराएको थियो ।
आफू जनताको विकासका लागि निर्वाचित जनप्रतिनिधि भएकाले जनताको घरदैलोमा पुगेर काम गर्नका लागि पालिकाको सम्पत्ति प्रयोग गर्न आवश्यक नहुने ठानेर मोटरसाइकल पालिकालाई नै फिर्ता गरिदिएको वडाध्यक्ष फुयाँलले बताए ।
‘पालिकाको सुविधाबापतको खर्च बरु वडा विकासमा लगानी गर्ने छु । जनप्रतिनिधिले जनताको काम गरेबापत थप सुविधा लिनु पर्छ भन्ने नलागेर सुविधाबापतको मोटरसाइकल फिर्ता गरेको हुँ । अहिले पनि सबै गाउँका कतिपय स्थानमा सडक पुगे पनि मोटरसाइकल लैजान गाह्रो हुन्छ । घोडा चढ्ने भएकाले उकालीओराली र सडक नभएको ठाउँका जनतालाई पनि भेट्न सहज भएको छ,’ उनले भने ।
वडाध्यक्ष फुयाँलको अनुभवमा वातावरणमैत्री भए पनि अहिलेको समयमा घोडा चढ्न सुलभ र सस्तो भने छैन ।
उनले परम्परालाई पछ्याउन मन लाग्ने भएकाले आफूले घोडा चढेको बताए ।
‘घोडा चढ्दा कतिपयलाई शरीर असन्तुलन भएर ढाड र जिउ दुख्ने हुन सक्छ । मलाई भने पहिले पनि घोडा चढेको हुनाले असहज लाग्दैन,’ उनले भने ।
उनले वडाध्यक्षमा विजयी भएपछि नागरिकको सेवामा विकास निर्माणसँगै विभिन्न सामाजिक कार्य गर्दै आएका छन् ।
