विराटनगर । आफूलाई सामाजिक अभियन्ता बताउने आशिका तामाङलाई प्रहरीले पक्राउ गरेको छ ।
जिल्ला प्रशासन कार्यालय काठमाडौंबाट पक्राउ पुर्जी लिएर प्रहरी वृत्त स्वयम्भूको टोलीले बुधबार दिउँसो तामाङलाई पक्राउ गरेको हो ।
उनीमाथि प्रहरी वृत्त गौशालाले थप अनुसन्धान अघि बढाएको छ ।
गत पुस २६ गते पशुपति क्षेत्र विकास कोषको पत्र जाहेरी र पुस २५ को प्रहरी प्रतिवेदनका आधारमा अनुसन्धान गर्न तामाङलाई नियन्त्रणमा लिएको प्रहरीको भनाइ छ ।
तामाङविरंद्ध प्रहरीले पुस २८ गते नै अभद्र व्यवहार कसुर शीर्षकमा जिल्ला प्रशासन कार्यालय बबरमहल काठमाडौंबाट पक्राउ पुर्जी लिएको थियो ।
जिल्ला प्रशासनको अनुमतिले बुधबार तामाङलाई पक्राउ गरिएको प्रहरीको भनाइ छ ।
पछिल्लो समय पशुपति क्षेत्र विकास कोष परिसरमा तामाङले महिला प्रहरीलाई दुव्र्यवहार गरेको भिडिओ सामाजिक सञ्जालमा भाइरल बनेको थियो ।
उनले आफूलाई सामाजिक अभियन्ता भन्दै फेसबुकलगायत सामाजिक सञ्जालमा भिडिओहरू पनि पोस्ट गर्ने गरेकी छन् ।
कुनै बेलाकी चलचित्र कलाकार, पेसाले नर्स आशिका पछिल्लो समय सोसल मिडियामा निकै चर्चित छिन् ।
१५ वर्ष जर्मनी बसेर स्वदेश फर्केकी उनी अहिले नेपालका सरकारी निकाय, सार्वजनिक स्थानमा भइरहेको आर्थिक बेथिति र अत्याचारको उजागर गर्दै आएको दाबी गर्छिन् ।
केही वर्षअघि ‘जनावरको हत्या गर्नु, खानु तर घरपरिवार, घरबार नभएका खसी, खसिनीहरूलाई हत्या गर्नू’ भनेर ट्रोल बनेकी उनले यसबीचमा ‘दुःखी, पीडित’लाई सहयोग गरेर मनग्य समर्थक पनि बटुलिसकेकी छन् ।
फेसबुकमा उनलाई १५ लाखले फलो गरेका छन् । केही वर्षयता समर्थकले उनलाई ‘सामाजिक अभियन्ता’ भन्ने गरेका छन् ।
