धनकुटा । धनकुटाको साँगुरीगढी गाउँपालिकामा प्रहरीले १२० किलो गाँजा बरामद भएको छ । साँगुरीगढी-९ स्थितबाट प्रहरीले गोली फायर गरी लागूऔषध गाँजा बरामद गरेको हो ।
बुधबार बिहान सवा ४ बजे बिक्री-वितरण तथा ओसारपसार भइरहेको भन्ने विशेष सूचनाको आधारमा प्रहरीले गाँजा बोकेको पाँचवटा मोटरसाइकलसहित ६ जनालाई पक्राउ गरेको हो ।
इलाका प्रहरी कार्यालय भेडेटारबाट खटिएको प्रहरी टोलीले साँगुरीगढी-९ स्थित कच्ची सडकखण्डमा चेकजाँचको क्रममा एकसाथ आउँदै गरेको ५ वटा मोटरसाइकल रोक्न खोजेको थियो ।
जसक्रममा मोटरसाइकलमा सवार रहेका व्यक्तिहरूले प्रहरी टोलीमाथि नै हातपात तथा ढुंगामुडा प्रहार गरेका थिए ।
त्यसपछि प्रहरीले एसएलआर राइफलबाट एक राउन्ड हवाई फायर गरी ओसारपसारमा संलग्न रहेका ६ जनालाई उनीहरूले मोटरसाइकलमा बोकेको १२० किलोग्राम गाँजासहित नियन्त्रणमा लिएको हो ।
पक्राउ पर्नेहरूमा धनकुटा सहिदभूमि गाँउपालिका-१ का ३४ वर्षीय नकुल राई, २१ वर्षीय ओमप्रकाश राई, साँगुरीगढी-८ का २८ वर्षीय मंगलकुमार राई, २९ वर्षीय बिसन राई, २६ वर्षीय थामबहादुर राई, २१ वर्षीय सुमन राई रहेका छन् ।
उनीहरूले प्रयोग गरेको को. ३८ प ३५२२, प्रदेश १-०२-०५३ प ९६६३, प्रदेश १-०२-०५३ प ८६१७, प्रदेश १-०२-०४३ प ९५९६ र को. १४ प ७७५० नम्वरको मोटरसाइकल रहेको छ ।
लागूऔषध गाँजासहित पक्राउ परेका उनिहरुको जिल्ला प्रहरी कार्यालय धनकुटाबाट कानूनी कारवाही तथा थप अनुसन्धान भइरहेको छ ।
