बर्दिया । आठ वर्षीया नातिनीलाई यौन दुर्व्यवहार गर्ने हजुरबुबालाई आठ महिना कैद सजायको फैसला सुनाइएको छ ।
बर्दिया जिल्ला अदालतले नातिनीलाई यौन दुर्व्यवहार गर्ने ४३ वर्षीय सानो हजुरबुबालाई आठ महिना कैदको सजाय सुनाएको हो ।
जिल्ला अदालतका न्यायाधीश डल्लुराम चौधरीको गत मंगलबारको इजालसले कसुर ठहर गर्दै आठ महिना कैद सजाय, २५ हजार रुपैयाँ जरिबाना तिराउने फैसला गरेको हो ।
यस्तै, पीडकलाई १० हजार रुपैयाँ क्षतिपूर्ति र ४ सय रुपैयाँ पीडित राहत कोषमा भराउने फैसला गरेको जिल्ला अदालतका श्रेस्तेदार कपिल पौड्यालले जानकारी दिए ।
बालिकालाई ०८० भदौ २१ गते यौन दुर्व्यवहार गरेको भन्दै पीडित पक्षले चैत्र २१ गते इलाका प्रहरी कार्यालय, ढोढरीमा उजुरी दिएको थियो ।
प्रहरीले आरोपितलाई चैत्र २१ गते पक्राउ गरेको थियो । पीडितको स्वास्थ्य परीक्षण चैत्र २१ गते बर्दिया अस्पताल, गुलरियामा भएको थियो ।
