सिन्धुपाल्चोक । सिन्धुपाल्चोकमा सासूलाई घरको छतबाट खसालिदिएको आरोपमा बुहारी पक्राउ परेकी छन् ।
सिन्धुपाल्चोकको बलेफी गाउँपालिका-५ की ६५ वर्षीया नानीमैया श्रेष्ठलाई घरको छतबाट खसालिदिएकी बुहारीलाई प्रहरीले पक्राउ गरेको हो ।
घरेलु हिंसा गरेको आरोपमा प्रहरीले ३३ वर्षीया बुहारी सबिना श्रेष्ठलाई बुधबार पक्राउ गरेको हो ।
पीडितलाई आरोपितले पुस ५ गते छतमा घाम तापिरहेको अवस्थमा छतबाट खसालिदिएको पीडित पक्षले आरोप लगाएको छ ।
पीडित महिलाको उपचार चौतारा अस्पतालमा सोही दिन पुस ५ गते उपचारको लागि लगिएकोमा चौतारा अस्पतालमा उपचार हुन नसकेपछि ट्रमा सेन्टर बनेपामा उपचारको लागि लगिएको छ ।
आरोपितविरुद्ध पुस ७ गते पीडितकी छोरीले जिल्ला प्रहरी कार्यालयमा उजुरी दिएपछि ज्यानमार्ने उद्योग शीर्षकमा मुद्दा अगाडि बढाइएको जिल्ला प्रहरी कार्यालयका डिएसपी उमाशंकर यादवले बताए ।
