विराटनगर । भनिन्छ नि, ‘दिन’ लागेपछि कसैको केही लाग्दैन । बर्दियाको बढैयाताल गाउँपालिका-५ राजपुरकी सिर्जना सुवेदीले श्रीमान् विवेक पंगेनीको जीवनमा यस्तै भएको छ ।
उनी एकपछि अर्को पीडाको दुष्चक्रमा परिरहेका छिन् । श्रीमान विवेकलाई प्राणघातक रोगबाट उन्मुक्त गराउन संघर्षरत सिर्जनाले केही महिनाअघि मात्र आफ्ना देवर गुमाएकी थिइन् ।
देवर विपीन सडक दुर्घटनामा परी अस्ताएका थिए । त्यसको डेड वर्षअघि मात्र उनले आफ्नी सासूको अन्त्येष्टि देख्नुपरेको थियो ।
सिर्जनालाई लिएर अध्ययन गर्न अमेरिका गएलगत्तै नेपालमा उनकी आमाको निधन भएको थियो ।
त्यसपछि उनीहरू आमाको काजक्रिया गर्न नेपाल फर्किए । काजक्रिया सकेर अमेरिका फर्केको एक सातामै विवेक बिरामी परेका थिए । अस्पतालमा परीक्षण गराउँदा ब्रेन क्यान्सर देखियो ।
त्यसयता सिर्जनाले एकछिन पनि श्रीमानको साथ छोडेकी थिइनन् ।
उनै विवेक अमेरिकाको अस्पतालमा मृत्युसँग लडिरहँदा सिर्जनाले लामो संघर्ष गरेकी थिइन्, श्रीमानलाई बचाउन । विवेक मृत्युसँग संघर्ष गर्दैगर्दा उनको हौसला बनेकी सिर्जनाले पतिवियोगको सामना गर्नुपरेको छ ।
क्यान्सरका कारण अमेरिकामा उपचाररत विवेकको निधन भएको हो ।
