विराटनगर । मोरङको सुन्दरहरैंचा नगरपालिकामा बालकलाई ठक्कर दिएर भागेको मोटरसाइकल लुकाएको अवस्थामा भेटिएको छ ।
सोमबार राति १२:३० बजेतिर सुन्दरहरैंचा-४ पंकज पेट्रोल पम्पनजिक तत्काल नामथर नखुलेको अन्दाजी २० वर्षीय युवा अचेत अवस्थामा फेला परेका थिए ।
घाइते अवस्थामा फेला परेका उनलाई तत्काल उपचारको लागि विराट टिचिङ अस्पताल बूढीगंगा ल्याइएको थियो ।
अनुसन्धानका क्रममा उनी सुनसरीको इटहरी उपमहानगरपालिका-११ खनारका हिरण्यप्रसाद दाहालका छोरा १६ वर्षीय ज्ञानेन्द्र दाहाल रहेको खुलेको थियो ।
उनलाई गछियाबाट बलियातर्फ जाँदै गरेको को १७ प ६५५४ नम्बरको मोटरसाइकलले ठक्कर दिएको खुलेपछि इलाका प्रहरी कार्यालय, बेलबारीबाट खटिएको टोलीले मोटरसाइकल खोजी थालेको थियो ।
बेलबारीका प्रहरी निरीक्षक कृष्णबहादुर खत्रीको कमाण्डमा खटिएको प्रहरी टोलीले बुधबार दिउँसो १२:३० बजेतिर उक्त मोटरसाइकल सुन्दरहरैंचा-५ दुलारीमा लुकाएर राखेको अवस्थामा फेला पारेको हो ।
साथै, प्रहरीले चालक भारत घर भई हाल सुन्दरहरैंचा-४ दुलारीस्थित लक्ष्मी चौधरीको घरमा डेरा गरी बस्ने ३७ वर्षीय रामप्रसाद पण्डितलाई पक्राउ गरेको हो ।
उनलाई लेटाङ नगरपालिका-२ स्थित उत्तरी मोरङ क्रसरबाट नियन्त्रणमा लिएर इलका प्रहरी कार्यालय, बेलबारीमा ल्याई राखिएको प्रहरी निरीक्षक खत्रीले जानकारी दिए ।
