विराटनगर । नेपाल घरेलु तथा साना उद्योग महासंघ जिल्ला कार्यसमिति विराटनगर र प्रोटेक्टिभ माइक्रो इन्स्योरेन्स लिमिटेडबीच लघु निर्जीवन बीमा सञ्चालनका लागि सम्झौता भएको छ ।
विराटनगर महानगरपालिका-५ स्थित महासंघ जिल्ला कार्यसमितिको कार्यालयमा बुधबार दुई पक्षबीच सम्झौता भएको हो ।
सम्झौतापत्रमा प्रोटेक्टिभ माइक्रो इन्स्योरेन्स प्रमुख कार्यकारी अधिकृत नरेशकुमार रोक्का र महाप्रबन्धक अभिम डंगोल तथा महासंघका तर्फबाट अध्यक्ष चेतन निरौला र सचिव भवेश पौडेलले हस्ताक्षर गरे ।
घरेलु उद्योग महासंघसँग आवद्ध उद्योगी, व्यवसायी, कर्मचारी, सेवाग्राहीलगायतसँग सम्बन्धितको सम्पत्ती दायित्वलाई लघु निर्जीवन बीमामार्फत आर्थिक सुरक्षा प्रदान गर्नेगरी सम्झौता भएको अध्यक्ष निरौलाले जानकारी दिए ।
जिल्लाभरिका लघुउद्यमी र कृषि उद्यमीलाई लक्षित गरेर सम्पत्ती बीमासम्बन्धी समझारीमा हस्ताक्षर भएको उनको भनाइ छ । जसअनुसार प्रोटेक्टिभ माइक्रो इन्स्योरेन्सले ५० लाखसम्मको बीमा गर्ने छ ।
‘माइक्रो इन्स्योरेन्सले लघु तथा साना उद्यमी र व्यवसायीहरूलाई लक्षित गरी काम गरिरहेकोले हामीले यो सम्झौता गरेका हौं,’ उनले भने, ‘साना उद्यमीमाथिको सम्भावित जोखिम न्यूनीकरणका लागि यो इन्स्योरेन्सले काम गर्ने छ भन्ने हाम्रो अपेक्षा छ ।’
साथै, अध्यक्ष निरौलाले मोरङभरिका सबैखाले उद्यमीहरूलाई यसको लाभ लिन आग्रह गरे ।
उनका अनुसार घरेलु तथा साना उद्योगमा आवद्ध वर्ग-समुदाय तथा परिवारलाई लक्षित गरी निर्जीवन बीमा सचेतना कार्यक्रम सञ्चालन गर्नेसमेत सम्झौता भएको छ ।
