झापा । झापाको बिर्तामोड नगरपालिकाका पूर्व नगरप्रमुख ध्रुवकुमार शिवाकोटी पक्राउ परेका छन् ।
बालिकालाई जबरजस्ती करणी गरेको आरोपमा उनलाई सोमबार (आज) प्रहरीले पक्राउ गरेको हो ।
झापाको काँकडभिट्टाबाट उद्दार गरिएकी १७ वर्षीया बालिकाको बयानका आधारमा उनलाई पक्राउ गरिएको प्रहरीले जनाएको छ ।
ती बालिकालाई घरको काम गरिदिने र पढाइदिने शर्तमा घरेलु कामदारका रूपमा राखिएको खुलेको छ ।
बिर्तामोड– ५ स्थित आफ्नै घरमा घरेलु कामदार राखेर पटक–पटक करणी गरेको आरोप शिवाकोटीमाथि छ ।
बालिकालाई कलेज ड्रेसमै काँकडभिट्टाबाट भारत लैजान खोज्दै गर्दा नाकामा रहेको आफन्त नेपालको सहयोगमा प्रहरीले उद्दार गरेको हो ।
बालिकाले घटनाका बारेमा सुनाएपछि प्रहरीले शिवाकोटीलाई पक्राउ गरिएको हो ।
प्रहरीका अनुसार पक्राउ परेका शिवाकोटीमाथि करणी आरोपको विषयमा अनुसन्धान भइरहेको छ ।
प्रहरीका अनुसार पीडित बालिकाका बुवा छैनन् भने आमा भारतमा छिन् ।
आमाले पनि दोस्रो विवाह गरेपछि शिवाकोटीले घरको काम गर्ने र पढाउने भन्दै बालिकालाई आफ्नो घरमा ल्याएका थिए ।
उनी प्राविधिक विषय पढिरहेकी थिइन् ।
शिवाकोटी २०७४ सालको स्थानीय तहको निर्वाचनमा नेकपा एमालेबाट बिर्तामोड नगरपालिकाको प्रमुखमा निर्वाचित भएका थिए ।
