विराटनगर । पूर्व-पश्चिम राजमार्गअन्तर्गत सुनसरीको इटहरी उपमहानगरपालिकामा भएको सवारी दुर्घटनामा श्रीमान्–श्रीमतीको मृत्यु भएको छ ।
इटहरी-१६ बालग्राममा आइतबार मध्यान्ह भएको दुर्घटनामा मोटरसाइकलमा सवार श्रीमान्–श्रीमतीको मृत्यु भएको हो ।
को ३६ प ५६३७ नम्बरको मोटरसाइकलमा सवार संखुवासभा धर्मदेवी नगरपालिका-३ का ३२ वर्षे युवराज गुरुङ र सोही उमेरकी टीका गुरुङको मृत्यु भएको इलाका प्रहरी कार्यालय पकलीले जनाएको छ ।
मृत्यु भएका एक दम्पतीलाई सुरुमा टिपरले ठक्कर दिएको र पछि म्याजिकले किचेको प्रारम्भिक अनुसन्धानबाट खुलेको छ ।
बुलेट मोटरसाइकल पकलीबाट इटहरीतर्फ आउँदै गरेको थियो । इटहरी आउँदै गरेको मोटरसाइकललाई सुरुमा को १ क ३३८८ टिपरले ठक्कर दिएको थियो ।
ठक्करबाट मोटरसाइकलमा सवार दम्पती लडेका थिए । सोहीबेला गुडिरहेको प्रदेश १–०२–००१ ज ३८११ नम्बरको म्याजिक भ्यानले किचेको सुनसरी प्रहरीले जनाएको छ ।
दुर्घटनामा घाइते भएका दुवै दुवैको वीपी कोइराला स्वास्थ्य विज्ञान प्रतिष्ठान धरानमा उपचारका क्रममा मृत्यु भएको हो ।
प्रहरीका अनुसार सिसिटिभी फुटेजमा म्याजिकसँगै अर्को एउटा टिप्परले पनि ठक्कर दिएको देखिएकाले गर्दा त्यसबारे पनि अनुसन्धान भइरहेको छ ।
प्रहरीले म्याजिक चालकलाई भने नियन्त्रणमा लिइसकेको छ ।
