म्याग्दी । हिमाली जिल्ला म्याग्दीका किसान बिक्री गर्ने समय हुन लागेको सुन्तला झर्दा किसान चिन्तित भएका छन् ।
सुन्तला पकेट क्षेत्रका रूपमा रहेको बेनी नगरपालिका-३ र ४ मा कृषकहरूको बगानका सुन्तला आफैँ झर्न थालेपछि उनीहरूलाई चिन्ता परेको हो ।
बेनी नगरपालिका –४ बास्कुनाका किसानमा सुन्तला झरेर सकिने हो कि ! भनेर चिन्ता थपिएको हो ।
अबको एक महिनाभित्र बेचेर सकिने सुन्तला झर्दा निकै चिन्ता थपिएको कृषक सन्दीप खत्री बताउँछन् ।
बास्कुना क्षेत्रको ठुलो बगान रहेका खत्रीले भने,‘सुन्तला झर्न थालेपछि कृषि ज्ञान केन्द्र, बेनी नगरपालिकाको कृषि शाखा तथा गण्डकी प्रदेशबाट समेत प्राबिधिक बोलाएर नमुना संकलन गरेर लगेको भए पनि झर्नुको कारण भने खुल्न सकेको छैन ।’
सुन्तलामा पर्याप्त मात्रामा सिँचाइ पनि पुगेकै हो, तर पनि सुन्तला झर्नुको कारण पत्ता लागेको छैन ।
औंसा किरा परेर, सिँचाइको मात्रा नपुगेर वा फ्रुट फ्लाइ नाम किराको आक्रमणबाट गरी यो तीन कारणले सुन्तला झरेको हुन सक्ने भनेर प्राविधिहरूले भने पनि यकिन कारण भने नखुल्न नसकेको उनको दुःखेसो छ ।
कृषि, भूमि व्यवस्था तथा सहकारीमन्त्री पद्मा जिसी श्रेष्ठले बास्कुनाका कृषकहरूका सुन्तलाप्रति चासो राख्दै झर्नुको कारण चाँडो पत्ता लगाउन भनेकी छन् ।
अर्का कृषक नरबहादुर खत्रीले आफूले सुन्तला खेती गर्न लागेको २० औं वर्ष भए पनि यतिका धेरै सुन्तला झरेको यसभन्दा अघि कहिल्यै नदेखेको बताए ।
कृषि ज्ञान केन्द्रकी सूचना अधिकारी गंगा लामिछानेले सुन्तला बगानमा गएर नमुना संकलन गरेर प्रदेशमा पठाइएको भए पनि त्यसको आधिकारिक केही कारणबाट जानकारी नआएको बताइन् ।
कृषकहरूले समस्याको बारेमा बताएको भए पनि त्यसमा गएर अनुसन्धान गर्दा पनि थप कारण पत्ता नलागेकाले ल्याब परीक्षणकै लागि नमुना पठाइएको उनको भनाइ छ ।
बेनी नगरपालिका–४ बास्कुना क्षेत्रमा मात्र गत वर्ष ७५–८० लाख रुपियाँको सुन्तला बिक्री भएको थियो ।
त्यस्तै, बेनी नगरपालिका –३ को राखु तथा मरेक क्षेत्रबाट पनि त्यत्ति नै मात्रामा सुन्तला बिक्री भएको थियो ।
यस वर्ष गत वर्षभन्दा सुन्तला राम्रो फलेको भए पनि बिक्रीको समयमा झर्न थाल्दा समस्या भएको उनको भनाइ छ ।
