धरान । सुनसरीको धरान उपमहानगरपालिकाबाट तीन क्विन्टल गाँजासहित कृषि फर्मका सञ्चालक पक्राउ परेका छन् ।
धरान-१७ खैरेनी स्थित सुप्रिम एग्रिकल्चर कृषि फर्मबाट तीन सय सात किलो गाँजासहित सञ्चालक मनिराज राई पक्राउ परेका हुन् ।
कात्तिक २७ गते राति कृषि फर्ममा लागुऔषध गाँजाको कारोबार भइरहेको छ भन्ने विशेष सूचनाको आधारमा प्रहरीले उनलाई पक्राउ गरेको हो ।
कोशी प्रदेश प्रहरी कार्यालय विराटनगर र इलाका प्रहरी कार्यालय धरानबाट खटिएको प्रहरी टोलीले फर्मको कोठामा १० वटा प्लास्टिकको बोरामा लुकाई छिपाई राखेको अवस्थामा गाँजा बरामद गरेको हो ।
फर्मबाट गाँजा बरामद भएसँगै फर्म संचालक धरान-१३ का ४४ वर्षीय राईलाई प्रहरीले नियन्त्रणमा लिएको हो ।
यस विषयमा थप अनुसन्धान भइरहेको प्रहरीले जनाएको छ ।
