विराटनगर । कोभिड महामारीपछि सिर्जित विश्वव्यापी आर्थिक मन्दीका बीच सुनसरी-मोरङ औद्योगिक कोरिडोरमा एउटा नयाँ उद्योग सञ्चालनमा आएको छ ।
अरिहन्त ग्रुपले औद्योगिक करिडोरअन्तर्गत सुनसरीको सोनापुरमा टायल उद्योग स्थापना गरेर उत्पादन बजारमा ल्याएको हो ।
तीन अर्ब लगानीमा अरिहन्त इन्फ्रा प्रालिले निमाटो ब्रान्डमा टायलको व्यावसायिक उत्पादन गरेर बजारमा ल्याएको हो ।
जसको कमान्ड २४ वर्षीय जयश लुनियाँले गरिरहेका छन् ।
अमेरिकाको बोस्टन युनिभर्सिटीबाट सन् २०२१ मा व्यवस्थापन संकायमा स्नातक अध्ययन सकेर नेपाल फर्किएका जयशले उक्त उद्योगको नेतृत्व गरिरहेका छन् ।
जयश तार र पाइप उद्योग गरिरहेका बुबा गिरीशसँग टायल उद्योगको कमान्ड सम्हाल्न पाउनुपर्ने शर्त राखेर स्वदेश फर्किएका हुन् ।
६ वर्षअघि टायल उद्योग स्थापना गर्न सुरु गरिएको सम्भाव्यता अध्ययनले अहिले सार्थकता पाएको हो । उद्योगका उत्पादन अहिले देशभर पठाउन थालिएको छ ।
लुनियाँका अनुसार पोर्सलिन, सेरामिक र विक्ट्रिफाइड गरी तीन प्रकारका टायल छन् ।
विक्ट्रिफाइड टायल सबैभन्दा स्तरीय मानिन्छ । यस टायलले पानी सोस्तैन । नेपालमा पहिलो विक्ट्रिफाइड टायलको मेसिन उद्योगले नै लगाएको दाबी गरिएको छ ।
दैनिक १८ हजार वर्गमिटर टायलको उत्पादन भइरहेको सञ्चालक लुनियाँले जानकारी दिनुभयो ।
उद्योगले नेपालको माटोसमेत प्रयोग गर्नका लागि अनुसन्धान टोली परिचालन गरेको सञ्चालक जयशले जानकारी दिए ।
नेपालको माटोबाट पोर्सलिन र सेरामिक टायल उत्पादन गर्न सकिने सम्भावना धेरै रहेको छ तर विक्ट्रिफाइड टायल निकाल्न सकिन्छ/सकिँदैन भन्ने यकिन भइनसकेको उद्योगी लुनियाँको भनाइ छ ।
कोरिडोरमा स्थापना भएको पहिलो टायल उद्योगमा दक्ष एक सय र अर्धदक्ष तीन सय गरी कुल चार सय जनाले रोजगारी पाएको दाबी छ ।
कोशी प्रदेशका काँकडभिट्टा र विराटनगर नाकाबाट टायल निर्यात गर्ने योजनासमेत राखिएको उनको भनाइ छ ।
सन् २०२२ को फेब्रुअरीमा निर्माण सुरु भएको अरिहन्त इन्फ्रा प्रालिले २०२४ को अक्टुबरदेखि निमाटो ब्रान्डमा टायलको व्यावसायिक उत्पादन सुरु गरेको हो ।
