विराटनगर । जिल्ला प्रहरी कार्यालय मोरङमा हलचल आएको छ । पछिल्लो पटक अनलाईन जुवा र क्रिप्टोसँग जोडिएको विषय उजागर भएपछि मोरङ प्रहरीमा हलचल सुरु भएको हो ।
पछिल्लो पटक मोरङका एसपी नवराज कार्कीसहित पाँच प्रहरी अनुसन्धानमा तानिएका छन् । जसअनुरूप एसपी कार्की त प्रहरी प्रधान कार्यालय नै तानिएका छन् ।
एसपी कार्कीको निर्देशमा जुवा तथा अनलाइन (क्रिप्टो) कारोबारीसँग २५ लाख लिएको प्रकरणमा मोरङ प्रहरीमा कार्यरत एक प्रहरी निरीक्षक (इन्स्पेक्टर)सहित चारजना आफ्नो नियन्त्रणमा लिएर कोशी प्रदेश प्रहरी कार्यालयले छानबिन र अनुसन्धान अगाडि बढाएको छ ।
जिल्ला प्रहरी कार्यालयमा कार्यरत प्रहरी निरीक्षक विक्रमबहादुर भट्टराई, हवल्दार राजकुमार श्रेष्ठ, सहायक हवल्दार सरोज श्रेष्ठ र इलाका प्रहरी कार्यालय बेलबारीमा कार्यरत हवल्दार खगेन्द्र राउतमाथि अनुसन्धान भइरहेको छ ।
४० लाख रुपैयाँ लिएर अबैध कारोबारमा रहेकालाई पक्राउ नगर्ने सहमति कार्कीको टिमले गरेको बताइएको छ ।
जसमा २५ लाख रुपैयाँको लेनदेन तत्कालै भएको खुलेको छ ।
तर, प्रहरी, अबैध कारोबारी र बिचौलियाबीचको अविश्वासको कारण घटनाको रिपोर्ट उपल्लो नेतृत्वमा पुग्दा एसपीसहित प्रहरी छानविनमा तानिएका हुन् ।
दसैं तथा आसपासको समयमा मोरङमा तस्करी र जुवाजन्य गतिविधि बढेको र त्यसमा प्रहरीकै संरक्षण र समन्वय रहेको पाइएको थियो ।
कोशी प्रदेश प्रहरी कार्यालयका प्रवक्ता प्रहरी वरिष्ठ उपरीक्षक भीमबहादुर दाहालले जिल्ला प्रहरी कार्यालय मोरङबाट इन्स्पेक्टरसहित चारजनालाई प्रदेश प्रहरी कार्यालयमा ल्याएर अनुसन्धान एवम् छानबिन प्रारम्भ गरिएको बताए ।
घुमुवा प्रहरीका रूपमा खटिँदै आएका चारै जनामाथि जुवाजन्य र तस्करीका गतिविधिको संरक्षण गरेको र जुवा खेल्ने र खेलाउनेसँग लाखौं रूपैयाँ लिएको आरोप लागेको छ ।
उनीहरूमाथि अनलाइन जुवाको सेटिङ गर्ने अनि गराइदिने र त्यस वापत मोटो रकम असुल गर्ने साथै तस्करीजन्य गतिविधिको पनि समन्वय र संरक्षण गर्ने गरेको आरोप लगेको छ ।
प्रवक्ता प्रहरी वरिष्ठ उपरीक्षक दाहालका अनुसार प्रदेश प्रहरी कार्यालयले उनकै संयोजकत्वमा गठन गरेको छानबिन समितिले इन्स्पेक्टर भट्टराईसहितका चारजना प्रहरीमाथि अनुसन्धान र छानबिन सुरु गरेको हो ।
चारजना प्रहरीलाई प्रदेश कार्यालय ल्याएर आफ्नो संयोजकत्वमा गठित छानबिन समितिले आवश्यक अनुसन्धान, सोधपुछ र बयान लिने काम गरिरहेको दाहालले बताए ।
यसैबीचमा एसपी नवराज कार्की हेडक्वाटर तानिएपछि मोरङ जिल्लाको प्रहरी प्रमुखको जिम्मेवारी प्रहरी उपरीक्षक नारायणप्रसाद चिमरियाले सम्हालेका छन् ।
हेडक्वाटरको निर्णयअनुसार नेपाल प्रहरी विशेष सुरक्षा गण दुहबीका गणपति प्रहरी उपरीक्षक चिमरिया जिल्ला प्रहरी कार्यालय मोरङमा सोमबार हाजिर भई मोरङ प्रहरी प्रमुखको जिम्मेवारी सम्हालेका हुन् ।
एसपी कार्की हेडक्वाटर तानिएपछि मोरङ प्रहरी प्रमुखका रूपमा राजन लिम्बु आउन लागेका थिए । तर, नेपाली कांग्रेसको अवरोधका कारण लिम्बुको स्थानमा चिमरिया मोरङ आएका हुन् ।
