उदयपुर । उदयपुरमा श्रीमानले पेट्रोल खन्याएर शरीरमा आगो लगाएकी एक जना महिलाको मृत्यु भएको छ ।
उदयपुर प्रहरीका अनुसार बेलका नगरपालिका–८ की ४० वर्षीया पूर्णकुमारी राईको मृत्यु भएको हो ।
प्रहरीका अनुसार पूर्णकुमारीलाई श्रीमान् ४८ वर्षीय दानबहादुर राईले असोज २२ गते पेट्रोल खन्याएर आगो लगाएका थिए ।
सामान्य घरायसी विवादका कारण श्रीमानले घरको भान्सा कोठामा श्रीमतीको शरीरमा पेट्रोल खन्याएर आगो लगाएका थिए ।
आगोले शरीरका विभिन्न भाग जलेको थियो । गम्भीर अवस्थाकी पूर्णकुमारीको धरानस्थित बीपी कोइराला स्वास्थ्य विज्ञान प्रतिष्ठानमा उपचार भइरहेको थियो ।
तर, उपचारकै क्रममा सोमबार मृत्यु भएको जिल्ला प्रहरी कार्यालय उदयपुरका प्रहरी नायव उपरिक्षक (डिएसपी) राजन चापागाईले जानकारी दिए ।
उनका अनुसार शवलाई पोस्टमार्टम गरेर अन्त्येष्टिका लागि आफन्तको जिम्मा लगाइसकिएको छ ।
श्रीमतीको शरीरमा पेट्रोल खन्याएर आगो लगाउने दानबहादुरलाई प्रहरीले नियन्त्रणमा लिएको छ ।
उनीविरुद्ध ज्यानसम्बन्धी कसुरमा मुद्दा चलाउन अदालतबाट म्याद थप गरेर अनुसन्धानको बाँकी प्रक्रिया अघि बढाइएको प्रहरीले जनाएको छ ।
