इटहरी । बलात्कार मुद्दामा फसाई दिने भन्दै प्रहरीसँग मिलेर ३० लाख असुल्ने भिमादेवि थापा पक्राउ परेकी छन् ।
सुनसरीको इटहरी निवासी थापालाई बिहीबार पक्राउ गरिएको प्रहरीले जनाएको छ ।
उनले ललितपुर भैसेपाटी प्रभागकी इन्स्पेक्टर बिनुकुमारी शाहीसँग मिलेर रकम असुली गरेको प्रहरीको आरोप छ ।
एक व्यवसायीलाई प्रभागकै हिरासतमा थुनामा राखेर ३० लाख असुली गरेको घटना बाहिर आएपछि थापा पक्राउ परेकी हुन् ।
सोही प्रकरणमा यसअघि नै सुष्मा विक र ताज इस्लामलाई पक्राउ गरेको प्रहरीले थापालाई गत बिहीबार पक्राउ गरेको हो ।
व्यापारीले दिएको ३० लाख मध्ये इटहरीकी थापाको खातामा २० लाख जम्मा भएको पाइएको छ ।
भैँसेपाटीमा भेट्न बोलाएको बेला ती व्यापारीलाई प्रभागको प्रहरीले पक्राउ गरेको थियो ।
पक्राउपछि बलात्कार मुद्दामा फसाइदिने भन्दै बार्गेनिङ गरेर युवतीले ६० लाख रुपैयाँ मागेको व्यापारीले बताए ।
पछि ३० लाख रुपैयाँमा सहमति भएपछि ती व्यापारीले फस्न सक्ने डरले पैसा बुझाएको उनले प्रहरीलाई बयान दिएका छन् ।
३० लाख मध्ये २० लाख रुपैयाँ खातामा जम्मा गरेको र १० लाखको चेक दिएका थिए । प्रहरीले चेक समेत बरामद गरेको बताएको छ ।
प्रारम्भिक सोधपुछमै घटना हनीट्रयापिङ भएको र त्यसमा प्रहरीले सहयोग गरेको खुलेपछि दुई जनालाई परिसरले थुनामा राखेर अनुसन्धान अघि बढाएको हो ।
युवतीले लिएको चेक समेत बरामद भएको छ भने पैसा हालिएको खातासमेत रोक्का राखिएको छ ।
घटनाका एक योजनाकार फरार छन् । ती व्यक्तिलाई भगाउन समेत भैँसेपाटी प्रभागको भूमिका देखिएको छ ।
घटनाको विषयमा डिएसपी नरहरि अधिकारीको नेतृत्वमा समिति गठन गरी छानबिन अघि बढाइएको छ ।
हाल प्रभागकी इन्स्पेक्टर शाहीको मिलेमतो देखिएपछि उनलाई निलम्बन गरिएको छ ।
