विराटनगर । मोरङको सुन्दरहरैंचा नगरपालिका-७ मा विष खुवाएर दुई नाबालिका छोरीको हत्या आरोपमा पक्राउ परेकी २१ वर्षीय अस्मिता पौडेल (कार्की) पुर्पक्षको लागि कारागार चलान भएकी छन् ।
धनकुटाको पाख्रीवास नगरपालिका–६ घर भएर सुन्दरहरैंचा–७ मालती टोल बस्ने अस्मितालाई मंगलबार जिल्ला अदालत मोरङका न्यायाधीश पारसमणि पोखरेलको इजलासले पुर्पक्षको लागि थुनामा राख्ने आदेश दिएको हो ।
अदालतको आदेशपछि उनी जिल्ला कारागार मोरङ चलान भएको मोरङ अदालतका सूचना अधिकारी हेमबहादुर बुढाथोकीले जानकारी दिए ।
यही भदौ १४ गते बेलुकी पति अर्जुन कार्कीसँग सामान्य विवाद भएपछि अस्मिताले दुई छोरी तीन वर्षीया अर्पणा र एक वर्षीया आइंकालाई केराको बगानमा लगी विष सेवन गराएर हत्या गरेकी थिइन् ।
दुई बालिकाको शव यही भदौ १५ गते प्रहरीले सुनदरहरैंचा-७ स्थित केरा बगानमा फेला पारेको थियो । प्रहरीले हत्याको आरोपित अस्मितालाई खोजतलासको क्रममा भदौ १९ गते झापाबाट पक्राउ गरेको हो ।
झापाको बिर्तामोड नगरपालिका-५ स्थित पूर्व-पश्चिम लोक मार्गनजिक एभरेस्ट बैंकअगाडिबाट उनलाई प्रहरीले पक्राउ गरेको थियो ।
पक्राउ परेकी अस्मितालाई इलाका प्रहरी कार्यालय बेलबारीले कर्तव्य ज्यान मुद्दामा म्याद थप गरेर अनुसन्धान सुरु गरेको थियो ।
निर्माणाधीन घरमा पानी नलगाएको विषयलाई लिएर पति ३१ वर्षीया अर्जुन कार्कीसँग विवाद भएपछि उनले छोरीहरूको हत्या गरेको स्वीकारेकी थिइन् ।
यसरी भएको थियो घटनाः
अस्मिता धनकुटाको पाख्रिबास नगरपालिका–५ घर भइ सुन्दरहरैंचा–७ मा बस्दै आएका अर्जुन कार्कीकी पत्नी हुन् ।
अर्जुन दुई छोरी र पत्नीसहित दिदी सीता रेग्मीको घरमा बस्दै आएका थिए । आइंका र अपर्णा नाबालिका छोरीहरू हुन् ।
अर्जुनले नयाँ घर निर्माण पनि गर्दै थिए । निर्माणाधीन घरमा पानी लगाउने विषयलाई लिएर अर्जुन र अस्मिताबीच विवाद सुरु भएको थियो ।
पतिसँगको विवादले रिसाएकी अस्मिता शुक्रबार साँझ कलिला नानीहरू लिएर बेपत्ता भएकी थिइन् ।
अस्मिताले ‘तेरा छोरी मारिदिइसकें, म पनि मर्छु’ भनेर पतिको मोबाइलमा म्यासेज पठाएकी थिइन् ।
अस्मिताले प्रयोग गर्ने मोबाइल नाबालिकाहरुको शवनजिकै फेला परेको थियो ।
उनले पहिले मेटासिस पिइन् र छोरीहरूलाई पनि पियाइन् । विष खुवाएर छोरीलाई मारेपछि रातभर विक्षिप्त भएर जंगलतिर भौतारिइन् ।
भोलिपल्ट बेलबारीको खोसार्नेबाट गाडी चढेर बिर्तामोड पुगिन् । बिर्तामोडमा पाँच दिनसम्म जंगलको छेउ र बस्तीनजिक भौतारिएर विक्षिप्त मानसिकतामा हिँडेको थिइन्, उनी ।
मंगलबार राति १ जना शंकास्पद महिलाले स्थानीयको घरमा बास माग्दै हिँडेको भनेर स्थानीय सञ्चारकर्मीले प्रहरीलाई जानकारी दिएको थियो ।
प्राप्त जानकारीकै आधारमा हुलिया विश्लेषण गर्दै खोजी गर्दा अस्मितालाई जीवितै फेला पार्न प्रहरी सफल भएको हो ।
प्रहरीका अनुसार अस्मिता केही मानसिक समस्यामा रहेजस्तो पनि देखिन्छ ।
अस्मिताले आफूले पनि विष सेवन गरेको बयान दिएकी थिइन् ।
उनका भनाइअनुसार पतिसँग बारम्बार झैझगडा र विवाद हुने गरेको थियो ।
