विराटनगर । नेपाल घरेलु तथा साना उद्योग महासंघ, मोरङ शाखाले विराटनगरमा वित्तीय साक्षरता कार्यक्रम गरेको छ ।
महासंघले बिहीबार विराटनगर महानगरपालिका-४ स्थित इन्द्रेणी पार्टी प्यालेसमा वित्तीय जागरूकताको आवश्यकतालाई मध्येनजर गरेर उक्त कार्यक्रम गरेको हो ।
कुमारी बैंकसँगको सहकार्यमा आयोजित उक्त कार्यक्रममा मोरङका विभिन्न स्थानका करिब दुई सय लघु, साना तथा मझौला उद्यमीहरूको उपस्थिति रहेको थियो ।
कुमारी बैंक प्रादेशिक कार्यालय विराटनगरका प्रमुखले उक्त कार्यक्रमको सहजीकरण गरेका थिए भने घरेलु उद्योग महासंघका केन्द्रीय उपाध्यक्ष मुकेशकुमार उपाध्याय, कोशी प्रदेश अध्यक्ष अञ्जु उपाध्यायहरूको उपस्थिति रहेको थियो ।
लघु उद्यमीहरूले आर्थिक गतिविधि गरिरहँदा भुलबस रूपमा हुने त्रुटीहरूबारे यथोचित जानकारी दिने लक्ष्यका साथ उक्त कार्यक्रम गरिएको घरेलु उद्योग महासंघका अध्यक्ष चेतन निरौलाले जानकारी दिए ।
वित्तीय साक्षरता प्रवर्द्धन गरी विभिन्न स्थानमा रहेका व्यावसायिक एवम् उद्यमशील सोचलाई औपचारिक वित्तीय संयन्त्रमा आकर्षित गर्ने प्रयासस्वरूप कार्यक्रम गरिएको उनको भनाइ छ ।
वित्तीय ज्ञान, सीप, मनोवृद्धि तथा व्यवहार विकाससहित सर्वसाधारणको विषयगत संवेदनशीलतालाई सहजै बुझ्नेगरी उद्यमीहरूलाई सिकाइएको थियो ।
उनीहरूलाई बैंकिङ कारोबारमा बानी बसाल्नसमेत आग्रह गरिएको थियो ।
