दुहबी । सुनसरीको दुहबी नगरपालिकाले माध्यमिक शिक्षा परीक्षा (एसइई) सकेर बसेका विद्यार्थीहरूलाई मध्येनजर गरी ‘पढदै कमाउँदै’ कार्यक्रमको थालनी गरेको छ ।
नगरप्रमुख वेदनारायण गच्छादारले प्राविधिक शिक्षासँग जोडेर औद्योगिक प्रशिक्षार्थी अध्ययनका लागि पढ्दै कमाउँदै कार्यक्रम लिएर विद्यार्थीहरूसँग साक्षात्कार गरेका छन् ।
दुहबी नगरपालिका वडा नम्बर ८ मा मंगलबार विद्यार्थीहरूसँग चारवटा विषयमा औद्योगिक प्रशिक्षार्थी अध्ययनका लागी जानकारीसहित साक्षात्कार गरिएको हो ।
दीगो तथा सम्मानित रोजगारीका लागि इन्स्योर परियोजना हेल्भेटास, दुहबी नगरपालिका, लघु उद्यम शाखा, उद्योग संगठन मोरङ, मनमोहन पोलिटेक्निक बूढीगंगा गाउँपालिका, वडा नम्बर ८ को कार्यलयलगायत विद्यार्थीहरूको ठुलो संख्यामा उपस्थित रहेको थियो ।
वडा अध्यक्ष तारिकचन्द्र सरदारको अध्यक्षता र नगरप्रमुख गच्छादारको प्रमुख आतिथ्यमा उक्त कार्यक्रम आयोजना गरिएको थियो ।
मनमोहन पोलिटेक्निकका प्राचार्य सुदीप अधिकारी, लघु उद्यमशाखाका प्रमुख दिवेस चौधरी, रोजगार शाखाका पवन प्रधान, शिक्षा शाखा प्रमुख विकाश घिमिरेलगायत सरोकारवाला निकायका प्रमुखहरूको उपस्थिति रहेको थियो ।
सीप आर्जन गरी सम्मानित जीवनयापनका लागि दुहबी नगरपालिकाले किशोर-किशोरीहरूलाई सिपमुलक आय आर्जनका थुप्रै कार्यक्रमहरू सञ्चालन गर्दै आएको छ ।
पढ्दै कमाउँदै कार्यक्रममा हाल चारवटा क्षेत्रमा ८० जना विद्यार्थीको आवेदन माग भएको छ । २४ महिने प्रि-डिप्लोमा इन मेकानिकल इन्जिनियर, इलेक्टिकल इन्जिनियर, अटोमोबाइल इन्जिनियर र आइटीमा हाल आवेदन माग गरिएको छ ।
साढे ३ महिना मनमोहन विश्वविद्यालय माअध्ययन गर्नु पर्ने र बाँकी साढे १९ महिना सम्बन्धित पढाइको क्षेत्र मिल्ने उद्योगमा काम गर्नुपर्ने हुन्छ ।
उक्त काम गरेबापत कम्पनीले मासिक एक चौथाइ तलब दिने छ ।
यसरी काम गर्दै र पढ्दै गरिसकेपछि विद्यार्थीको चाहनाअनुसार कम्पनीले उचित तलबसहितको रोजगारीसमेत उपलब्ध गराउने छ ।
त्यसका लागि दुहबीका नगरप्रमुख गच्छादारले उद्योगलाई ५ प्रतिशत राजश्वसमेत छुट गरिदिने कार्यपालिका बैठकबाट नै निर्णय गराइसकेका छन् ।
गच्छादारले युवाहरूलाई सीपसहितको शिक्षा दिलाई स्वरोजगार र आत्मनिर्भर बनाउने बाटोमा आफू सधैँ प्रयत्नशील रहेको सुनाए ।
विभिन्न तालिम र अध्ययनका लागि छात्रवृत्तिमा करोडौं खर्च गर्दै आएकोले युवाहरूले पनि कदम अगाडि बढाउनु पर्नेमा उनले जोड दिए ।
युवालाई रोजगार, सुरक्षा र विश्वासको जरुरत रहेको हुँदा आफू यसमा कहिले खुट्टा नकमाउने र सधैँ युवाहरूको आवश्यकताको ग्यारेन्टी गर्ने प्रतिबद्धता उनले ब्यक्त गरे ।
दुहबी नगरपालिकाले हाल इ-रिक्सा र गार्मेन्ट फेब्रिकेटरमा ४० जनाको आवेदन माग गरेको छ भने निकट भविष्यमै लाइट भेहिकल मेकानिक्स र कम्युटर हार्डवेर एन्ड नेटवर्किङ मा ४० जनाको आवेदन माग गर्दै छ ।
