विराटनगर । मोरङ बूढीगंगा गाउँपालिका-१ हिमगिरी साबुन फ्याक्ट्रीअगाडि मोटरसाइकलले ठक्कर दिई घाइते भएका पैदलयात्रुको उपचारका क्रममा मृत्यु भएको छ ।
शनिबार साँझ कोशी लोकमार्गमा नेमुवाबाट विराटनगरतर्फ आउँदै गरेको प्र १-०२-०४४ प ८४४ नम्बरको मोटरसाइकलले सडक क्रस गर्दै गरेको पैदलयात्रीलाई ठक्कर दिएको थियो ।
७ः१० बजेतिर तीव्रगतिको मोटरसाइकलले ठक्कर दिँदा पैदलयात्री झापाको चारआली बाराङटोल घर भई हाल बूढीगंगा-१ बस्ने २४ वर्षीय आकाश मण्डल गम्भीर घाइते भएका थिए ।
उनको उपचारका क्रममा विराट शिक्षण अस्पतालमा बुधबार बिहानका राति २ः३० बजेतिर मृत्यु भएको प्रहरीले जनाएको छ ।
दुर्घटनामा मोटरसाइकल चालक ग्रामथान गाउँपालिका- ४ बस्ने १८ वर्षीय अक्षत माझी पनि घाइते भएका छन् । उनको पनि विराट शिक्षण अस्पतालमै उपचार भइरहेको छ ।
उनले बिनालाइसेन्स तीव्र गतिमा मोटरसाइकल हुँइक्याउँदा दुर्घटना भएको प्रहरीले जनाएको छ ।
अक्षत नेकपा एमालेकी कोशी प्रदेशसभा सदस्य ललिताकुमारी चौधरीका छोरा हुन् । सत्तारूढ दल एमालेको तर्फबाट समानुपातिक सांसद रहेकी उनी एमाले प्रदेश संसदीय दलको सचेतक पनि हुन् ।
लाइसेन्स नै प्राप्त नगरेका छोरालाई मोटरसाइकल किनेर चलाउन दिनु अभिभावकको लापरबाही भएको प्रहरीले औंल्याएको छ ।
