झापा । स्थानीय निर्वाचनमा आफूलाई भोट दिएर जिताउने जनतासँग नै वडाध्यक्षले ८० हजार रुपैयाँ घुस लिएको पाइएको छ ।
झापाको बुद्धशान्ति गाउँपालिका वडा नं. २ का वडाध्यक्ष गोपाल ओलीले नगद ८० हजार रुपैयाँ घुस लिएका हुन् ।
बिर्तामोडस्थित हनुमान कम्प्लेक्स अगाडि घुस रकम लिँदै गर्दा मंगलबार (आज) दिउँसो ओलीलाई पक्राउ गरिएको प्रहरीले जनाएको छ ।
घुस रकम लिँदै गर्दा ओलीलाई नेत्र विक्रम चन्द विप्लव नेतृत्वको नेपाल कम्युनिस्ट पार्टीका नेता कार्यकर्ताहरूले रकमसहित नियन्त्रणमा लिएर प्रहरीलाई बुझाएका छन् ।
जमिनमा घर जग्गा बाटोको सिफारिस गरिदिएबापत उनले घुस रकम असुल गरेको पार्टीको प्रदेश कमिटी सदस्य अर्जुन पाण्डेले जानकारी दिए ।
पीडितले पार्टीमा जानकारी गराएपछि योजनाबमोजिम रकम लिँदालिँदै ओली पक्राउ परेका हुन् ।
भारतको सिलिगुडी निवासी अमरनाथ चौहानबाट जग्गा मिलाइदिने नाममा रकम लिँदालिदै ओलीलाई नियन्त्रणमा लिइएको हो ।
चौहानले जग्गासम्बन्धी कारोबारमा वडा अध्यक्ष ओलीलाई रकम बुझाएका हुन् । वडा अध्यक्षले रकम नदिए काम रोक्ने भनेपछि चौहानले बिर्तामोडमा आएर पैसा बुझाएका हुन् ।
अहिले वडाध्यक्ष ओलीलाई इलाका प्रहरी कार्यालय अनारमनीको नियन्त्रणमा राखेर प्रहरीको क्षेत्राधिकार नभएकोले अख्तियार दुरुपयोग अनुसन्धान कार्यालयमा खबर गरिएको छ ।
