विराटनगर । फाउन्डेसनको स्थापना गरी समाजसेवा तल्लीन रहँदै आएका युवा नेता अभिषेक गिरीले शनिबार विराटनगरका एक विपन्न, असहाय तथा गरिब परिवारलाई नगद तथा सामग्री सहयोग गरेका छन् । विराटनगर महानगरपालिका-१८ जतुवास्थित एक विपन्न परिवारलाई गिरीले आर्थिक रूपमा सहयोग गर्दै लत्ताकपडा पनि हस्तान्तरण गरेका हुन् ।
सिटी सफारी चलाउँदै आएको उक्त परिवारका छोरा वैदेशिक रोजगारका क्रममा विदेश गएका थिए । तर, स्वास्थ्य अवस्थाले साथ नदिएर स्वदेश फर्कनु परेपछि जाँदा लागेको ऋणपानसमेत तिर्न नसकेर परिवारको गुजारामै सकस भएको थियो ।
उक्त परिवारले लामो समयदेखि आर्थिक संकटको सामना गर्दै आएको थियो । सिटी सफारी चालकहरूमार्फत् उक्त कुरा अवगत भएपछि आफूले आज विपन्न परिवारको घरै पुगेर सहयोग गरेको गिरीले बताएका छन् । टिमसहित पुगेर नगद, सिरक र डसना हस्तान्तरण गरेका गरेको उनको भनाइ छ ।
‘सामाजिक उत्तरदायित्व बहन गर्नेक्रममा भावि दिनमा पनि यो परिवारले कुनै अप्ठ्यारो सामना गर्नुपरेमा थप सहयोग गर्नेछु,’ उनले भने ।
गिरीले फाउन्डेसनबाट सामाजिक सेवा गरिररहेका छन् भने कोशी सुधार अभियानको संयोजक बनेर सार्वजनिक तथा निजी अस्पताल र सामुदायिक विद्यालय सुधार गर्ने, सार्वजनिक सम्पत्तिको संरक्षण गर्ने, सरसफाइ र वृक्षारोपणमा सक्रियता जनाइरहेका छन् ।
त्यसबाहेक उनले समय-समयमा विभिन्न टोलमा स्वास्थ्य शिविरहरू सञ्चालन गर्दै आएका छन्, जसले विपन्न वर्गलाई स्वास्थ्य सेवा उपलब्ध गराउन ठूलो योगदान पुऱ्याएको छ ।
गिरीले कोशी सुधार अभियानमार्फत् विराटनगरका केही निजी तथा सार्वजनिक अस्पतालमा निरीक्षण गर्ने कामलाई तीव्रता दिइरहेका छन् । शिक्षा, स्वास्थ्यलगायत विविध विषयमा सुधार गर्न तम्सिएका गिरीले केही दिनअघि मात्र सुनसरीको बर्जु गाउँपालिका-५ बर्जुमा स्थानीय युवाहरूले गरिरहेको निःशुल्क ट्युसन सेन्टरको अनुगमन गरेका थिए ।
त्यसबाहेक केही दिनअघि सुन्दरहरैंचा नगरपालिकामा-५ स्थित हसिना सिमसार तथा पर्यटकीय क्षेत्रमा केही दिनअघि वृक्षारोपण गर्ने र सरसफाइ गर्ने स्थानीयको काममा सघाउ पुर्याएका थिए । हालैमात्र उनले जिल्लास्तरीय फुटबल प्रतियोगितामा सहयोग गरी खेलाडीलाई हौसला प्रदान गरेका थिए ।
उनी भन्छन्, ‘समाजमा सबैले समान अवसर पाउनुपर्छ । गरिबी र असमानताका कारण उत्पन्न हुने समस्याहरूलाई कम गर्नका लागि एक-अर्कालाई सहयोग गर्ने कामलाई निरन्तरता दिएको हुँ ।’
