विराटनगर । विराटनगरमा पहिलोपटक आयाेजना गर्न लागिएको कृषि एक्स्पाेकाे तयारी पूरा भएको छ । निजी क्षेत्र नेपाल उद्योग वाणिज्य महासंघको कोशी प्रदेश समितिले एक करोड रुपैयाँ खर्चेर बिहीबारदेखि कृषि एक्स्पोको आयोजना गर्दै छ ।
बिहीबारदेखि चार दिनसम्म सञ्चालन गर्ने एक्स्पाेकाे तयारी पूरा भएको मंगलबार पत्रकार सम्मेलन गरी नेपाल उद्योग वाणिज्य महासंघ काेशी प्रदेश अध्यक्ष राजेन्द्र राउतले जानकारी दिए ।
विराटनगरकाे तीनपैनीदेखि पूर्वतर्फ रहेको कृषि बजारमा एक्स्पाेमा १३० वटा स्टल रहने छन् । एक्स्पाेमा भारतकाे काेलकत्ता र बिहारका २० वटा कृषिका स्टलहरू रहने उनले बताए ।
एक्स्पाे अवधिभर कृषि, पशुपक्षी, कष्टम हाइरिङ, क्लाइमेट चेन्ज, जैविक मल तथा विषादी बनाउने र प्रयोग विधिलगायत विषयमा नेपाल र भारतका विज्ञकाे सहभागितामा संवाद राखिएको छ ।
कृषि औजारकाे प्रदर्शनी, उन्नतजातका पशुपंक्षीकाे प्रदर्शनी, पशुपंक्षी तथा कृषि उपजकाे प्रतियोगिता खेतदेखि भान्साकाे अनुभव र फुट फेस्टिवल गरिने उनले बताए ।
राउतले नेपाल र भारतका १५ जना कृषि विशेषज्ञले कृषि एक्स्पोमा सहभागिता जनाउँदै कृषि क्षेत्रलाई समयअनुकुल अगाडि बढाउने र किसानलाई फाइदा पुर्याउने विषयमा बृहत छलफल हुने जानकारी दिए ।
मेलामा अवलाेकनका लागि बाहिर जिल्लाबाट आउनेका लागि खाना र बस्न निःशुल्क गरिएको अध्यक्ष राउतले बताए । पहाडी जिल्लाबाट अवलोकनका लागि आउने र एकै दिनमा फर्कन नसक्नेका लागि बस्ने र खाने सुविधा दिइएको उनले बताए ।
कृषिमा आत्मनिर्भर बनाउनका लागि सहयोग गर्ने उद्देश्यसहित आयाेजना गरिएको एक्स्पाे सञ्चालनका लागि एक कराेड खर्च लाग्ने राउतले बताए ।
एक्स्पोस्थल कटहरी थोक बजारमा पाँचवटा ब्लक छुट्याइएको छ । जसमा ‘ए’ मा ब्लकमा पशुपक्षी, ‘बी’ ब्लकमा कृषि, ‘सी’ ब्लकमा मेसिनरी, ‘डी’ ब्लकमा फुड स्टल र इ ब्लकमा गोष्ठी तथा परामर्श सेवाका कार्यक्रम सञ्चालन हुनेछन् ।
