विराटनगर । मोरङको ग्रामथान गाउँपालिका–२ झोराहटस्थित जनक मेमोरियल सेकेन्डरी बोर्डिङ स्कुलका विद्यार्थीहरूले बेसाहाराहरूको आश्रयस्थल बनेको मानव सेवा आश्रमलाई सहयोग गरेका छन् ।
जनकमा कक्षा १० मा अध्ययनरत विद्यार्थीहरूले आइतबार विराटनगर महानगरपालिका–१० तीनटोलियामा रहेको मानव सेवा आश्रमलाई विभिन्न खाद्यान्नहरू सहयोग गरेका हुन् । करिब १२ किलोमिटर बाटो छिचोल्दै आज बिहान तीनटोलिया आइपुगेर जनकका विद्यार्थीहरूले असाहाराहरूलाई खाना पस्किए ।
सडक मानव, अपाङग, असहायहरूको बसोबास रहेको उक्त आश्रममा जनकका विद्यार्थीहरूले पस्किएको खाना खाएर बेसहाराहरू खुसीले गदगद देखिन्थे । उनीहरूले कलिला विद्यार्थीहरूलाई आशीर्वाद दिए ।
करिब दुई घण्टा मानव सेवा आश्रममा बिताउन पाउँदा र बेसहाराहरूलाई सहयोग गर्न पाउँदा खुसी लागेको जनककी छात्रा सलिना माझीले बताइन् ।
आश्रममा आश्रित बेसहराहरूलाई सहयोग गर्न अरूलाई पनि सुझाव दिने जनकका छात्र विशाल पुर्वेले सुनाए ।
स्कुलका प्रिन्सिपल सुनील भगतले विद्यार्थीलाई कक्षाकोठाबाहिरको वास्तविक संसार देखाउने र सामाजिक कार्यमा पनि विद्यार्थीको अग्रसरता बढाउन मानव सेवा आश्रम आइपुगेको सुनाए । स्कुले उमेरदेखि नै सामाजिक कर्तव्य र जिम्मेवारीप्रति सचेत बनाउन पनि विद्यार्थीकै आग्रहमा आश्रममा सेवा गर्न आएको उनको भनाइ थियो ।
तथापि, आश्रमको दैनिकी बाहिरबाट सोचेजस्तो नभएको उल्लेख गर्दै उनले यहाँ रहेका दीनदुखीहरूको सहयोगमा कुनै कन्जुस्याइँ नगर्न अरूलाई अपिल गरे । जनकका शैक्षिक प्रमुख सुरज अधिकारी र अरू चार शिक्षक अनि ४५ विद्यार्थीको टोली आश्रम पुगेको थियो ।
विराटनगर–१० मा विसं २०७६ बहालको घरबाट स्थापना भएको आश्रममा बालक, जेष्ठ नागरिक, सडक मानव, अपाङग, असहायहरूले आश्रय लिने गरेका छन् ।
मुख्यतः बेसाहारा एवम् असाहय भई भोकभोकै सडक पेटीमा वसोवास गर्नेलाई सहारा दिने उद्देश्यले आश्रममा राखिएको छ । प्रदेश सरकार, स्थानीय निकाय र समाजसेवी एवम् दाताहरूको सहयोगबाट आश्रमको दैनिक कार्य सञ्चालन भइरहेको छ ।
