विराटनगर । सुनसरी र उदयपुर जोड्ने सप्तकोशी नदीको चतरा पुलबाट अन्दाजी ३५ वर्षका एक युवक नदीमा हामफालेर बेपत्ता भएका छन् ।
सोमबार अपरान्ह करिब साढे चार बजे ती युवक सुनसरीतर्फबाट को ९ प ९८६५ नम्बरको स्कुटर लिएर पुलमा पुगेका थिए । पुलको बीच भागमा स्कुटर रोकेर उनले नदीमा हामफालेको प्रत्यक्षदर्शीले जनाएका छन्।
नदीमा हामफाल्नुअघि उनले मोबाइल र घडी पुलको डिलमा राखेको पाईएको छ । उनको स्कुटर उदयपुरतर्फ फर्किएको थियो ।
उदयपुर र सुनसरीतर्फ पुलको दुवैतिर रहेको प्रहरीले युवकको खोजीका लागि प्रयास गरेपनि उनलाई कोशीले बगाएर लगेको प्रत्यक्षदर्शीहरूले बताए ।
युवकको पहिचान नखुलेको स्थानीय प्रहरीले जनाएको छ । प्रहरीले कोशी पुलमा जडान गरेको सिसिटिभी फुटेजमा पनि युवक नदीमा हामफालेको देखिएको जनाइएको छ ।
