विराटनगर । सुस्त मनस्थितिकी १४ वर्षीया बालिकालाई जबरजस्ती करणी गरेर फरार भएका एक पुरुष नौ वर्षपछि समातिएका छन् ।
पक्राउ पर्नेमा साकेला गाउँपालिका–२ रतन्छाका ३६ वर्षीय नरदेश राई रहेका छन् ।
राई २०७२ माघ १८ गते राति आफन्तको घरबाट घर फर्कँदै गरेकी सुस्त मनस्थितिकी किशोरीलाई बाटो छेकेर सामूहिक बलात्कार गरेर फरार भएका थिए ।
बालिका बलात्कृत भएको दुई दिनपछि वि.सं २०७२ माघ २० गते आफन्तले दिएको जाहेरीका आधारमा जिल्ला अदालतले वि.सं २०७९ चैत ३० गते नरदेशसहित घटनामा संलग्नलाई कैद सजाय सुनाएको थियो ।
जिल्ला अदालतले कैद सजाय सुनाएको तीन वर्षपछि नरदेशलाई घरमा आएको मौका पारेर आइतबार पक्राउ परेका हुन् ।
सामूहिक बलात्कारको घटनापछि लुकीछिपी बस्दै आएका नरदेशलाई प्रहरी चौकी रतन्छाले आइतबार राति १० बजे पक्राउ गरेपछि सोमबार जिल्ला ल्याइएको थियो ।
जिल्ला ल्याइएलगत्तै अदालतमा हाजिर गराइएका नरदेशलाई अदालतले कैद भुक्तानका लागि कारागार चलानको आदेश दिएको प्रहरीले जनाएको छ ।
रातको समयमा बाटो छेकेर सामूहिक रूपमा भएको जबरजस्ती बलात्कारको घटनामा संलग्न अन्यको खोजी भइरहेको प्रहरीले जनाएको छ ।
नौ वर्षअघि सामूहिक रूपमा बलात्कारमा परेकी किशोरीको अवस्था सामान्य रहेको जनाइएको छ ।
